पुर्तिघाटबजार (गुल्मी) । गुल्मीको कालीगण्डकी गाउँपालिका–६ को बरल्वामा सुक्खा पहिरो जाँदा कालीगण्डकी करिडोर अवरुद्ध भएको छ ।
२०८० फागुन ११ गते शुक्रबार राति बरल्वाको सुक्खापहिरोले गर्दा कालीगण्डकी करिडोर अवरुद्ध भएको हो ।
पहिरोले बागलुङ–गुल्मीखण्डअन्तर्गत मालढुङ्गा–अर्बेनी सडक पूर्ण रूपमा अवरुद्ध भएको छ । बागलुङको मालढुङ्गादेखि गुल्मीको अर्बेनीसम्म ४४ किलोमिटर खण्ड कालोपत्रका लागि स्तरोन्नतिको काम भइरहेको छ ।
काम चलिरहेकै बेला राति पहिरो खसेपछि सडक अवरुद्ध भएको र काम रोकिएको कालोपत्रको काम गरिरहेको निर्माण कम्पनी कालिका कन्स्ट्रक्सनले जनाएको छ ।
पहिलो पन्छाउन लगभग एक हप्ता लाग्ने बताइएको छ । पहिरोको विषयमा कालीगण्डकी करिडोर आयोजना कार्यालय पाल्पालाई जानकारी गराइएको कन्स्ट्रक्सनले बताएको छ ।
सडक अवरुद्ध भएपछि लामो तथा छोटो दुरीका सवारीसाधन चल्न सकेका छैनन् ।
भिरालो जमिन रहेको उक्त स्थानमा बेलाबेलामा सुक्खा पहिरो जाने गरेको छ ।
