काठमाडौँ । राष्ट्रिय जनमोर्चाका केन्द्रीय सल्लाहकार तथा राष्ट्रियसभाका सांसद राजेश विश्वकर्मा (तुलप्रसाद) ले किसानले सडकमा दुध पोखेकोमा सरकारको ध्यानाकर्षण गराउनुभएको छ ।
२०८० फागुन ११ गते शुक्रबार राष्ट्रियसभा बैठकको शून्य समयमा मन्तव्य राख्दै उहाँले यस्तो अभिव्यक्ति दिनुभएको हो ।
‘किसानहरू सडकमा दुध पोखिरहेका छन् । किन यस्तो भइरहेको छ’ उहाँले भन्नुभयो– ‘आफ्नो देशको उत्पादनले मूल्य पाउँदैन । मूल्य नपाएपछि किसानले आफ्नो उत्पादन सडकमा पोखिरहेका छन् ।’
मन्तव्यको क्रममा सांसद विश्वकर्माले सरकारले गरेको राम्रो कामका लागि भने धन्यवाद व्यक्त गर्नुभयो, साथै उहाँले बेथितिको विरोध पनि गर्नुभयो ।
उहाँ मिटरब्याजपीडतको विषय उठान गर्नुभयो ।
उहाँले भन्नुभयो– ‘हामीले देखिरहेका छौँ, मिटरब्याजपीडित महिनौँ लगाएर राजधानी आएका छन् । हामीले नै मिटरब्याजपीडितको हकहितका लागि कानुन पास गर्यौँ तर त्यो किन लागु भएन ? सरकारको ध्यान किन गएन ?त्यतातिर मैले ध्यान आकर्षण गर्न चाहान्छु ।’
यस्तो छ, सांसद विश्वकर्माद्वारा प्रस्तुत मन्तव्यको सम्पादित भाग :
‘सर्वप्रथम गृहमन्त्रालयले सबै ठाउँमा सर्कुलिङ गरेर राज्यको जग्गा हिनामिना भएको ठाउँमा त्यसलाई रेकर्ड पठाउने जुन काम गरेको छ, त्यसको लागि म सरकारलाई धन्यवाद दिन्छु । भ्रष्टाचार र त्यस किसिमको बेथिति नियन्त्रणका लागि सरकारले जे जति कदम उठाएको छ, ती सबै कदमको हामीले समर्थन गर्दछौँ ।
यति हुँदाहुँदै पनि आज देशमा विभिन्न प्रकारका घटना घटिरहेका छन् । हामीले देखिरहेका छौँ, मिटरब्याजपीडित महिनौँ लगाएर राजधानी आएका छन् । हामीले नै मिटरब्याजपीडितको हकहितका लागि कानुन पास गर्यौँ तर त्यो किन लागु भएन ? सरकारको ध्यान किन गएन ? त्यतातिर मैले ध्यान आकर्षण गर्न चाहान्छु ।
त्यसैगरी किसानहरू सडकमा दुध पोखिरहेका छन् । किन यस्तो भइरहेको छ । आफ्नो देशको उत्पादनले मूल्य पाउँदैन । मूल्य नपाएपछि किसानले आफ्नो उत्पादन सडकमा पोखिरहेका छन् ।
महिनौँ, वर्षाैँदेखि कति मुद्दा पेन्डिङ छन् । दाइजोको निहुँमा भएका हत्या, प्रेम सम्बन्धमा भएका हत्या, दलितमाथि भएका उत्पीडनको लागि पनि सरकारले तदारुकताका साथ त्यसलाई राहत दिनका लागि, त्यसलाई सम्बोधन गर्नका लागि सरकार किन चुकिरहेको छ । त्यसकारण यसतिर सरकाको ध्यान छिटोभन्दा छिटो जाओस् भन्न चाहान्छु ।
हामी यहाँ नीतिनियम पास गर्छौं । सङ्कल्प प्रस्ताव पास गर्छौ । त्यसलाई कार्यान्वयन गर्ने क्रममा सरकारले कुन निकायलाई आदेश दिने हो रु कसरी त्यसलाई व्यवहारमा लागु गर्ने हो साँच्चै नै हामी जनताको पक्षमा, उनीहरूको हकहितमा बनाएका कानुन हुन् भन्ने जनताले महसुस गर्न पाउनुपयो ।’
