काठमाडौं । दुई जनाको ज्यान जानेगरी ललितपुरको बालकोटमा भएको घटनाको मुख्य दोषीका रुपमा छानबिन आयोगले किटान गरेका भौतिक, पूर्वाधार तथा यातायातमन्त्री प्रकाश ज्वालालाई पदबाट निलम्बन गर्न दबाब बढेको छ ।
आइतबार प्रतिनिधिसभाको बैठकमा प्रमुख प्रतिपक्षी नेकपा (एमाले) र राष्ट्रिय स्वतन्त्र पार्टी (रास्वपा) ले मन्त्री ज्वालालाई तुरुन्तै पदबाट निलम्बन गर्न माग गरेका छन् ।
बैठकमा बोल्दै एमाले सचेतक महेश बर्तौलाले बालकुमारी घटनामा दोषी देखिएकाले उनलाई तुरुन्तै पदबाट निलम्बन गर्नुपर्ने बताए।
‘अविलम्ब त्यस घटनासँग जोडिएका मन्त्री र गृह प्रशासन पनि यस घटनासँग जोडिने सम्भावना छ। त्यो घटनासँग जोडिएका मन्त्रीलाई अविलम्ब पदबाट हटाइयोस्,’ बैठकमा बर्तौलाले भने।
संसद् सुरु हुनासाथ एमाले सांसदहरूले उठेर विरोध गरेपछि सभामुख घिमिरेले बर्तौलालाई बोल्ने समय दिएका थिए।
यस्तै, राष्ट्रिय स्वतन्त्र पार्टीले पनि मन्त्री ज्वालाको राजीनामा माग गरेको छ। प्रतिनिधिसभाको बैठकमा समय माग्दै दोषी देखिँदा पनि मन्त्री ज्वालाले राजीनामा नदिएको भन्दै सभापति रवि लामिछानेले आपत्ति जनाए।
‘देशमा रोजगारीको अवसर नपाएर विदेश जान्छु भनेका दुई युवाको गोली हानी हत्या गरियो। १० लाख दिएर सरकार चुप बस्यो,’ उनले भने, ‘छानबिन समितिले भौतिकमन्त्री नै दोषी देखिएको स्पष्ट पार्यो। यो स्पष्ट भइसक्दा पनि न सम्बन्धित मन्त्रीले आफ्नो नैतिकताको प्रदर्शन गर्नुभएको छ। न सरकार, न प्रधानमन्त्रीले कुनै छनक देखाउनुभएको छ।’
साथै, उनले सरकारकै छानबिन समितिले दोषी देखाउँदा पनि मन्त्री ज्वालालाई भाषण गर्दै हिँड्ने नैतिकता कहाँबाट आउँछ ? भन्दै प्रश्न गरे।
गत पुस १३ गते ललितपुरको बालकुमारी क्षेत्रमा भएको प्रदर्शनमा दुई जना युवाको ज्यान गएको थियो। सो घटना मन्त्री ज्वालाका कारण हुन पुगेको निष्कर्ष जाँचबुझ आयोगले निकालेको छ।
