टेकराज भुसाल, सन्धिखर्क ।
अर्घाखाँची भूमिकास्थान नगरपालिकाको ढाकाबाङका बाख्रापालक किसानलाई बोयर नश्लका बोका वितरण गरिएको छ ।
भेटेनरी अस्पताल तथा पशुसेवा विज्ञकेन्द्र अर्घाखाँचीको आर्थिक सहयोग तथा प्रगति कृषक सहकारी ढाकाबाङको सहजीकरणमा भूमिकास्थान, वडा नं. १ र २ का सहकारीमा आबद्ध कृषकलाई ५० प्रतिशत अनुदानका बोका वितरण गरिएको हो।
ढाकाबाङका विभिन्न क्षेत्रमा बाख्रापालन गर्ने छ जना किसानलाई भूमिकास्थानका नगरप्रमुख झविलाल थापा, भेटेनरी अस्पतालका प्रमुख विष्णुप्रसाद पौडेल र प्रगति कृषक सहकारी ढाकाबाङका अध्यक्ष भूवानन्द भुसालले बोका वितरण गरिएको थियो ।
सो अवसरमा मन्तव्य राख्दै नगरप्रमुख थापाले भूमिकास्थान नगरपालिकाको एक मात्रै बोयर बाख्रा प्रजनन स्रोत केन्द्र प्रगति सामुदायिक बोयर ब्रिडर हर्ड रहेको बताउँदै ब्रिडर हर्ड व्यावसायीकरणमा जान नसक्दा उत्पादन भएका बोयर जातका पाठा बिक्री हुन नसकेको र किसानले राम्रो आम्दानी प्राप्त गर्न नसकेको बताउनुभयो ।
प्रगति कृषक सहकारीका अध्यक्ष भुसालले सहकारीमा आबद्ध कृषकले प्राप्त गरेका बोकालाइ राम्रोसँग पालनपोषण गर्ने र प्रजनन व्यवस्थापन गर्ने प्रतिबद्धतासहित कृतज्ञता व्यक्त गर्नुभयो ।
कार्यक्रममा भूमिकास्थान नगरपालिकाका नगरप्रवक्ता तथा ४ नम्बर वडाका वडाध्यक्ष बाबुराम पन्थीसुनार, १ नं. वडाका अध्यक्ष गोपालप्रसाद खनाल, २ नं. वडाका अध्यक्ष बुद्धिबहादुर थापा, ३ नं. वडाका अध्यक्ष कृष्णप्रसाद बन्जाडे, भेटेनरी अस्पतालका प्रतिनिधि सुन्दरलाल विक, योगेन्द्र मरासिनी, विभिन्न सङ्घसंस्थाका अध्यक्षलगायतको उपस्थिति रहेको थियो।
कार्यक्रम भेटेनरी अस्पताल अर्घाखाँचीका प्रमुख विष्णुप्रसाद पौडेलको अध्यक्षता, प्रगति कृषक सहकारीका सचिव केबी राउतको सञ्चालनमा सम्पन्न भएको थियो ।
