काठमाडौं । माओवादी कार्यकर्ताहरूले १५ वर्षअघि गरेको व्यक्तिहत्याको मुद्दा ब्युँतिएको छ ।
१५ वर्षअघि कालीकोटका १७ वर्षीय किशोर राजबहादुर मल्लको हत्यामा संलग्न भएको अभियोगमा अखिल क्रान्तिकारीकी अध्यक्ष पञ्चा सिंहसहित ६ जना माओवादी कार्यकर्ताहरूविरुद्ध दोस्रो पटक पक्राउ पुर्जी जारी भएको छ ।
जिल्ला प्रहरी कार्यालय सुर्खेतका प्रवक्ता एवम् प्रहरी निरीक्षक कृष्णबहादुर खड्काले अदालतलबाट शुक्रबार जारी भएको पक्राउ पुर्जी आइतबार आइपुगेको जानकारी दिए।
सुर्खेतको जन माध्यमिक विद्यालयका विद्यार्थी राजबहादुरको २०६५ फागुन २६ गते साँझ खुकुरी प्रहार गरी हत्या भएको थियो।
त्यसपछि उनका काका नवराजले पदमबहादुर रावत ‘टाइगर’ विरुद्ध किटानी जाहेरी दिएका थिए। उक्त प्रकरणमा राजबहादुरका बुवाले पनि २०७९ ३ गते टाइगरसहित पञ्चा सिंहविरुद्ध पनि किटानी जाहेरी दर्ता गराएका थिए।
यो प्रकरणमा कालिकोटको महावै गाउँपालिका निवासी अखिल क्रान्तिकारी अध्यक्ष सिंहसहित ६ जनाविरुद्ध प्रकाउ पुर्जी जारी भएको छ।
प्रहरी निरीक्षक खड्काका अनुसार किशोर हत्या प्रकरणमा पदमबहादुर रावत, बालकृष्ण सिंह ‘गुराँस’ , टंकबहादुर सिंह, वीरबहादुर मल्ल ‘सुभाष’ र अनिल कार्की ‘अशोक’ विरुद्ध पक्राउ पुर्जी जारी भएको हो।
पक्राउ पुर्जी जारी भएसँगै घटनाबारे अनुसन्धान अघि बढाइएको खड्काले बताए। यसअघि पनि अदालतबाट पक्राउ पुर्जी जारी हुँदा प्रहरीले अभियुक्तहरूलाई पक्राउ गर्न आनाकानी गर्दै आएको छ ।
