नेपालगञ्ज । सहिद टोपबहादुर कार्कीको एक्काइसौँ स्मृतिदिवसमा उहाँको निवासमा औपचारिक कार्यक्रम सम्पन्न भएको छ ।
सहिदपत्नी पार्वती कार्कीको प्रमुख आतिथ्यमा २०८० पुस २९ गते शनिबार उहाँकै निवासस्थान कोहलपुर–१२ चप्परगौडीमा उक्त कार्यक्रम सम्पन्न भएको हो ।
सो अवसरमा मन्तव्य राख्दै प्रमुख अतिथि कार्कीले सहिद टोपबहादुर कार्कीले समाजमा आमूल परिवर्तनका लागि देख्नुभएको सपना पूरा गर्न नेकपा ९मसाल० निरन्तर सक्रिय रहेकोमा खुसी व्यक्त गर्नुभयो ।
वर्तमान व्यवस्था शोषण, दमनयुक्त भएकाले सहिद कार्की हिँडेको बाटोमा अझै पनि सम्पूर्ण परिवर्तनकारी शक्तिहरू अगाडि बढिरहनुपर्ने आवश्यकतामा उहाँले जोड दिनुभयो ।
कार्यक्रममा विशिष्ट अतिथि अखिल नेपाल किसान महासङ्घ ९अप्फा० का महासचिव तुलसिराम सापकोटाले नेकपा ९मसाल० ले सहिद कार्कीको बाटोलाई निरन्तर अगाडि बढाइरहेको दाबी गर्नुभयो ।
उहाँले सहिदका सपना पूरा गर्न सबैले सबै ठाउबाट पहल गर्नुपर्ने बताउनुभयो ।
कार्यक्रमको प्रारम्भका सहिद कार्कीको तस्बिरमा माल्र्यापण गरिएको थियो ।
त्यसपछि कार्यक्रममा अखिल नेपाल युवक सङ्घका अध्यक्ष कृष्णराज पाण्डे, राष्ट्रिय जनमोर्चाका लुम्बिनी प्रदेश समितिका सदस्य भीमप्रसाद देवकोटा, अखिल नेपाल महिला सङ्घ बाँकेकी जिल्ला सदस्य तथा सहिदपत्नी सीता अधिकारी र राजमो बर्दियाका सचिव लोकबहादुर रानाले मन्तव्य राख्नुभएको थियो ।
राजमो बाँकेका उपाध्यक्ष जगदीश ढकालको अध्यक्षता तथा जिल्ला सल्लाहकार जोगप्रसाद भण्डारीको सञ्चालनमा अघि बढेको सो कार्यक्रममा उपस्थित सहभागीलाई अप्फा बाँकेका संयोजक तिलकराज पौडेलले स्वागत गर्नुभएको थियो ।
सहिद कार्कीको २०५९ पुस ३० गते तत्कालीन शाही सेनाले हत्या गरेको थियो । त्यति बेला सेनाले उहाँका बुबा भोजबहादुरको पनि गोली हानी निर्मम हत्या गरेको थियो । बर्दियाको राजापुरस्थित मानपुर टपरामा घरबाट दुबै बाबुछोरालाई अपहरण शैलीमा लतार्दै निकालेर सेनाले नजिकैको तोरीबारीमा पुर्याएर गोली हानेर उहाँहरूको हत्या गरेको थियो ।
नेपाली सेनामा कार्यरत उहाँका छिमेकी हरिराम चौधरीले जग्गाको सीमाविवादका कारण माओवादीको आरोप लगाएर कार्कीको हत्या गराएका थिए । कार्कीको हत्यापछि राष्ट्रिय जनमोर्चाले देशव्यापी विरोध गरेको थियो ।
त्यस क्रममा सेनाले घटनाको छानबिन गरी गोली हान्न आदेश दिने कमान्डरसहित घटनामा संलग्नलाई आन्तरिक कारबाही गरेको थियो । शाहीकालमा सेनाले गोली चलाएको घटनामा आफ्ना कमान्डर विरुद्ध कोर्टमार्सल गरेको त्यो पहिलो घटना थियो ।
राजमोले त्यति बेलै कार्कीलाई सहिद घोषणा गरेको थियो । सहादत प्राप्त गर्ने बेलामा सहिद कार्की तत्कालीन जनमोर्चा नेपाल बर्दियाको सदस्य, अखिल नेपाल जनवादी युवा सङ्घ बर्दियाका सचिव र भेरीकर्णाली क्षेत्रीय समितिको सदस्य जस्ता जिम्मेवारीमा सक्रिय हुनुहुन्थ्यो ।
सहिद कार्कीको परिवार निरन्तर राजमोमा संलग्न रही राजनीतिप्रति क्रियाशील छ ।
