काठमाडौँ । राष्ट्रिय जनमोर्चाले राष्ट्रियसभा सदस्य निर्वाचनमा गठबन्धनका उम्मेदवारलाई मतदान गर्न अपिल गरेको छ ।
अध्यक्ष चित्रबहादुर केसीको हस्ताक्षरमा २०८० पुस २९ गते आइतबार प्रेसवक्तव्य जारी गर्दै राजमोले आगामी माघ ११ गते हुन गइरहेको राष्ट्रियसभा सदस्य निर्वाचनको सन्दर्भमा यस्तो अपिल गरेको हो ।
त्यस्तै, वक्तव्यमा राजमो उपाध्यक्ष तथा प्रवक्ता दुर्गा पौडेललाई राष्ट्रपतिद्वारा मनोनित हुने राष्ट्रियभाको महिला सदस्यलाई प्रस्ताव गरिएको उल्लेख छ ।
मन्त्रिपरिषद्ले निर्णय गरेर राष्ट्रपतिद्वारा मनोनित हुने उक्त प्रक्रिया लागु गर्नुपर्ने आसय उक्त वक्तव्यमा उल्लेख छ ।
यस्तो छ, प्रेसवक्तव्यको पूर्ण पाठ :
“राष्ट्रिय जनमोर्चाले राष्ट्रियसभाको आगामी चुनावमा गठबन्धन पक्षधर सबै उम्मेदवारलाई विजय बनाउनका लागि सबै मतदातासित अपिल गर्दछ । गण्डकी र लुम्बिनीका केही जिल्लामा मात्र हाम्रा मतदाता हुनुहुन्छ । हामीले हाम्रा सबै मतदातासित गठबन्धनका सबै उम्मेदवारलाई विजय बनाउनका लागि मत हाल्न अनुरोध गर्दछौँ । त्योबाहेक हाम्रा मतदाता नभएका अन्य प्रदेशमा पनि गठबन्धनका उम्मेदवारलाई मत हालेर विजय बनाउनका लागि सबै मतदातासित अनुरोध गर्दछौँ ।
हामीले राष्ट्रिय जनमोर्चाकी उपाध्यक्ष र प्रवक्ता का। दुर्गा पौडेललाई राष्ट्रपतिद्वारा मनोनित हुने राष्ट्रियसभाको महिला सदस्यका लागि प्रस्तावित गरेका छौँ । त्यो पद मन्त्रिपरिषद्ले निर्णय गरेर राष्ट्रपतिद्वारा मनोनित हुने पद भएकाले सरकार र राष्ट्रपतिद्वारा पनि उहाँलाई राष्ट्रियसभामा नियुक्त गर्ने कुरामा जोड दिन्छौँ ।”
