काठमाडौं । साविक विजेता एपीएफ क्लबलाइ पराजित गर्दै नेपाल पुलिस क्लबले कर्णाली प्रदेशको सुर्खेतमा सम्पन्न ३४औं राष्ट्रिय भलिबल प्रतियोगिताको उपाधि उचालेको छ।
सुर्खेतस्थित विरेन्द्रनगरमा बिहीबार सम्पन्न फाइनलमा एपिएफलाई ३–१ को सेटमा पराजित गर्दै पुलिस क्लब च्याम्पियन बनेको हो।
पहिलो सेट गुमाएको पुलिस क्लबले त्यसपछिका तिन सेटमा लगातार जित हात पर्दै विजेता बनेको हो।
पुलिस क्लबले पहिलो सेट २५–२२ ले गुमाएको थियो। दोस्रो सेटमा उत्कृष्ट पुनरागमन गर्दै पुलिस क्लबले २५–१९ ले नतिजा आफ्नो पक्षमा पार्यो।
तेस्रो सेट २५–१८ ले आफ्नो पक्षमा पारेको पुलिस क्लबले चौथो तथा अन्तिममा २५–२३ को नतिजा हात पार्न सफल भयो।
उपाधिसँगै पुलिस क्लबले १ लाख रुपैयाँसँगै शिल्ड, मेडल र प्रमाणपत्र प्राप्त गरेको छ।
आज नै तेस्रो स्थानका लागि भएको खेलमा गण्डकी प्रदेशले विभागीय त्रिभुवन आर्मी क्लबलाई ३–१ को सेटमा हराउँदै तेस्रो भयो।
पुलिसका रविन सर्वोत्कृष्ट, पहल उदीयमान खेलाडी
प्रतियोगितामा नेपाल पुलिस क्लबका स्पाइकर रविन चन्द सर्वोत्कृष्ट खेलाडी बने भने पुलिसकै पहल गहतराज उदीयमान खेलाडी घोषित भए।
सर्वोत्कृष्ट खेलाडी बनेका रविनले ट्रफीसँगै १० हजार रुपैयाँ प्राप्त गरे। यस्तै, उनलाई लक्ष्मी नारायाण मेमोरियल ट्रष्टबाट १२ हजार, अमेरिकामा रहेका नेपाल भलिबल संघ सुर्खेतका वरिष्ठ उपाध्यक्षले १० हजार रुपैयाँ, हङकङमा रहेका मोहन बाकमलले ५ हजार रुपैयाँ सम्मान स्वरूप पुरस्कार प्रदान गरेका छन्।
यस्तै, उदीयमान खेलाडी पहलले ट्रफीसँगै ५ हजार रुपैयाँ हात पारेका छन्। पुलिसकै कप्तान इम राना सेटर, रविन नगरकोटी ब्लकर, भीम गाहा लिवेरो र चन्द्र कुँवर उत्कृष्ट प्रशिक्षक चुनिएका छन्।
यस्तै, एपीएफका हेमन्त मल्ल स्पाइकर र गण्डकी प्रदेशका जीवन सुनार उत्कृष्ट सर्भर घोषित भएका छन्। उनीहरुले समान ५ हजार रुपैयाँसँगै ट्रफी हात पारेका छन्।
