शंकरप्रसाद पोखरेल, गुल्मी ।
गुल्मीको धुर्कोट गाउँपालिका वडा नं.५ वस्तुले लकडाउन उल्लंघन गर्नेलाई लाठीसहित कारबाही गर्न कार्यदल गठन गरेको छ । सोमबार वडा कार्यालयमा वसेको गाउँ सर्वदलीय बैठकले लकडाउन उल्लंघन गर्नेलाई लाठीसहितको कारबाही गर्न ५ सदस्यीय कार्यदल र टोलटोलमा निगरानी गर्न ८१ सदस्यीय स्वयंसेवक समेत गठन गरेको हो ।

पछिल्लो समय कोरोना भाइरसको नियन्त्रण गर्न सरकारले गरेको लकडाउन गाउँघरमा केही व्यक्तिहरूले उल्लंघन गरेकोले त्यसको रोकथाम तथा नियन्त्रण गर्नका लागि कार्यदल र स्वयंसेवक गठन गरिएको वडा नं। ५ वस्तुका वडा अध्यक्ष ढुण्डिराज भण्डारीले बताउनुभयो ।

बैठकले लोकहरि भण्डारीको संयोजकत्वमा ५ सदस्यीय मोवाइल टोलीलाई लठ्ठी समेत हस्तान्तरण गरि जथाभावी हिँड्नेलाई सुरूमा सम्झाउने यदि अटेरी गरेमा वल प्रयोग गरेर सुरक्षा कर्मीलाई जिम्मा लगाउने अधिकार समेत दिइएको वडा अध्यक्ष भण्डारीले बताउनुभयो ।

सर्वदलीय बैठकले गाउँपालिका भन्दा बाहिरबाट आउनेलाई निगरानी गर्न वडा भित्रका २८ टोलमा ८१ सदस्यीय स्वयंसेवक समेत खटाएको छ । गाउँपालिका भन्दा बाहिरबाट आउनेलाई निगरानी गरि होम क्वारेन्टिनमा राखिने निणय गरेको छ । यसका साथै वडाले विपन्न परिवारको सहयोग गर्न देश तथा विदेशमा रहने वस्तुवासी तथा अन्य सबैलाई सहयोगका लागि अपिल गरेको छ । वडा नं. ५ मा पहिलो चरणमा ४० जना विपन्न परिवारको पहिचान गरिएको छ ।

त्यस्तै गाउँपालिका अध्यक्ष भुपाल पोखरेलले गाउँघरमा आएका युवाहरू विभिन्न खेल खेल्ने तथा केही ठाउँमा जमघट समेत हुने भन्ने सुचना भएकोले यो लगडाउनको समयमा घर बाहिर ननिस्कन आग्रह गर्दै यदि त्यस्तो भेटिए गाउँपालिकाले कारबाहीका लागि सम्बन्धित निकायलाई बुझाउन बाध्य हुने बताउनुभयो ।

साथै गाउँपालिका भित्रका विपन्न परिवारलाई सहयोग गर्न गाउँपालिकाले गरेको अपिलबाट गाउँपालिकाको विपद व्यवस्थापन तथा राहत कोषमा ४ लाख भन्दा बढी रकम तथा केही खाद्यान्न सामाग्री संकलन भइसकेको भन्दै अध्यक्ष पोखरेलले सहयोगका लागि सबैमा आग्रह समेत गर्नुभएको छ ।