श्यामलाल पोखरेल, बुटवल ।
सरकारले देशभर लकडाउन गरेपछि अलपत्र परेका निर्माण क्षेत्रका मजदुरलाई रुपन्देहीको तिलोत्तमाबाट गाडीको व्यवस्था गरी घरमा पठाइएको छ । कोरोना भाइरसको संक्रमण रोक्नका लागि सरकारले देशभर लकडाउन गरेपछि निर्माण क्षेत्रमा काम गर्ने मजदुरहरु अलपत्र परेका हुन् ।

लकडाउनसंगै निर्माणको काम रोकिएपछि मजदुरहरु घर जान नपाएर अलपत्र परेका थिए । रुपन्देहीको तिलोत्तमा नगरपालिका वडा नम्बर २ र ३ को विभिन्न टोलमा घर निर्माण गर्दै आएका बांके बर्दिया र दाङका मजदुरहरु घरजान नपाएर अलपत्र परेका थिए ।

घर निर्माणको काम रोकिएको र सार्वजनिक सवारीका साधनहरु पनि बन्द भएपछि घर जान खोजेपनि मजदुरहरु घर जान सकेका थिएनन् ।

दैनिक ज्यालादारी गरी जिविकका चलाउंदै आएका मजदुरलाई तिलोत्तमा २ जानकीनगरका स्थानीय सुकदेव खनाल र नारायण भण्डारीको सहयोगमा सोमबार घर पठाइएको हो ।

काम रोकिएपछि अलपत्र परेका मजदुरलाई प्रशासनबाट सवारी पासको व्यवस्था गरी सुकदेव खनाल र नारायण भण्डारीले बांके, बर्दिया र दाङ पठाएका हुन् ।

तिलोत्तमा वडा नम्बर २ र ३ को विभिन्न टोलमा गत वर्षदेखि घर बनाउंदै आएका ५५ जना मजदुरलाई स्थानीयको सहयोगमा गाडीको व्यवस्था गरी घर पठाइएको हो । काम रोकिएपछि खानको समस्या परेका बर्दिया बांसगढीका महेन्द्र चौधरीले बताउनु भयो ।

बांके, बर्दिया, कैलाली, दाङ लगायतका जिल्लाबाट रुपन्देहीको विभिन्न ठाउंमा घर निर्माण गर्ने मजदुरहरुको संख्या ठूलो संख्या छ । वर्षौवर्ष अघिदेखि बाँके, बर्दिया, कैलाली र दाङबाट कामदार ल्याएर रुपन्देहीमा घर लगायतका अन्य निर्माणका काम गर्ने गरिएको छ ।

सीमा क्षेत्रमा दर्जनौ नेपाली अझै अलपत्र
कोरोना नियन्त्रणको लागि नेपाल र भारत दुवैतर्फ लक डाउन गरिएपनि भारतमा रहेका नेपाली नेपाल फर्किने क्रम रोकिएको छैन ।

भारतमा रोजगारी गर्दै आएका नेपाली लक डाउनको समयमासमेत लामो दिनको पैदल यात्रा गरि नेपाल भारत सीमानाका आईपुगेका नेपालीलाई नेपाल प्रवेश गराउँदा सरकारको लकडाउन पूर्ण रुपमा कार्यान्वयन हुन सकेको छैन । अर्घाखाँची र रुपन्देही घर भएका उनीहरु भारतमा २१ दिन लामो लक डाउन घोषणा भईरहेपछि दिल्लीदेखि पैदलयात्रा तय गरि हिँडेका थिए ।

तिनदिनको पैदलयात्रा गरी उत्तरप्रदेश आएका उनीहरु त्यहाँदेखि बस चढी सुनौली बसपार्क आईपुगेपछि नेपाल आउन सकेका छैनन् । उक्त समुहमा रहेका राजेश खनालले सुनौलीस्थीत भारततर्फको बसपार्कमा आईपुगेको र अहिलेसम्म बसपार्कमै बसीरहेको जानकारी गराएका छन् । सुनौली बसपार्कमा आएपछि पनि भोकै र प्यासै लामखुट्टेको टोकाइसँगै रात बिताउनु पर्ने नेपालीको बाध्यता छ ।