काठमाडौं । पशुपति क्षेत्र विकास कोषले मन्दिर परिसरमा गंगा आरति र दिप प्रज्वलनको फोटोभिडिओ खिच्न नपाइने भन्ने सूचनामा कोषको लोगो दुरुपयोग भएको जनाएको छ । बुढासुब्बा डिजिटल प्रालिको बिहीबारको सूचनाप्रति पशुपति विकास कोषले आपत्ति जनाएको हो ।
बिहीबार बुढासुब्बा डिजिटल प्रालि र पशुपति क्षेत्र विकास कोषको लोगोसहित जारी सूचनामा सो क्षेत्रमा खिचिएको भिडिओ व्यवसायिक प्रयोजनका लागि प्रयोग भएको थाहा पाइएमा कारबाही हुने चेतावनी दिइएको थियो ।
जसका लागि बुढासुब्बा डिजिटल प्रालिले स्वीकृत प्राप्त गरेको पनि सूचनामा उल्लेख थियो ।
उक्त सूचनाबारे कोषले आफ्नो लोगो दुरुपयोग भएको भन्दै संलग्नता अस्वीकार गरेको हो ।
कोषका कार्यकारी निर्देशक लक्ष्मी पुनले शुक्रबार सूचना प्रकाशित गरी बुढासुब्बा डिजिटल प्रालिले कोषको लोगो दुरुपयोग गरी सूचना प्रकाशित गरेको आरोप लगाएकी हुन्।
‘बुढासुब्बा डिजिटल प्रालिले यस श्रीपशुपतिनाथ आर्यघाट क्षेत्रको वागमति नदी किनारमा हुने गंगा आरति र कोर क्षेत्रमा हुने दिप प्रज्वलनको भिडियो खिच्न सख्त मनाही छ। यहाँ खिचिएका भिडिओ सामग्री फेसबुक, इन्ष्टाग्राम, टिकटक तथा युटुवमा व्यवसायिक प्रयोजनका लागि राखिएको थाहा भएमा डिजिटल कपिराईट ऐन अन्तर्गत कारवाही हुने जानकारी गराउँदछौं भन्ने सूचना विभिन्न सामाजिक सञ्जालमा प्रकाशित भएको प्रति कोषको गम्भिर ध्यानाकर्षण भएको छ’ कोषले भनेको छ,‘उक्त सूचनामा कोषको लोगो प्रयोग गरी कोषको नाम समेत राखी सूचना प्रकाशित भएकोमा कोषको असहमति रहेको छ। उक्त सूचना प्रकाशित प्रति कोषको कुनैपनि संलग्नता नरहेको व्यहोरा यसै सूचनाद्वारा जानकारी गराउँदछौं।’
