काठमाडौँ । ललितपुरमा डेरा कोठाभित्र प्रवेश गरी विभिन्न सामान चोरी गरेको आरोपमा दुई जना पक्राउ परेका छन् ।
पक्राउ पर्नेमा चोरी गर्ने भक्तपुरको ठिमी नगरपालिका–९ घर भई हाल काठमाडौँ बाफल बस्ने ४२ वर्षीय भूवन श्रेष्ठ र चोरीका सामान किन्ने चितवनको अयोध्यापुरी नगरपालिका–१२ घर भई बाफल नै बस्ने ५६ वर्षीय राजकुमार विश्वकर्मा रहेका प्रहरीले जनाएको छ ।
काठमाडौँ उपत्यका अपराध अनुसन्धान कार्यालयका अनुसार काभ्रेपलाञ्चोकको तिमाल गाउँपालिका–३ घर भई हाल ललितपुर महानगरपालिको ग्वार्को मिनिमार्केटनजिकै डेरा गरी बस्ने वर्ष २७ की सुमित्रा तामाङको डेराबाट मङ्सिर १८ गते नगद, गरगहना तथा महत्त्वपूर्ण कागजपत्रसमेत चोरी भएको थियो ।
घटनामा सिसिटिभी फुटेज तथा प्राविधिक विश्लेषणसमेतको अनुसन्धानको क्रममा खुल्न आएका चोरी गर्ने श्रेष्ठलाई अपराध अनुसन्धान कार्यालयबाट खटिएको टोलीले पुस १३ बाफलबाट चोरी भएका विभिन्न सामानसहित पक्राउ गरेको थियो ।
प्रहरीले चोरीको बिगो लिनेखाने तथा मास्ने कार्यमा संलग्न रहेको आरोपमा बाफलस्थित सुनचाँदीको पसल गरी बस्ने राजकुमार विश्वकर्मालाई समेत पक्राउ गरेको हो ।
बरामद सामानसहित आवश्यक कारबाहीका लागि जिल्ला प्रहरी परिसर ललितपुर पठाइएको अपराध अनुसन्धान कार्यालयले जनाएको छ ।
उनीहरूको साथबाट चोरीमा प्रयोग भएको बा९६ प५५४४ नम्बरको स्कुटी, कालो लेदरको झोला, रूप परिवर्तन गरिएको सुन ७५ लाललगायत सामान बरामद भएको छ ।
