काठमाडौँ । देशभरका उच्च अदालतमा २०८० पुस ८ गते आइतबारदेखि स्वचालित पेसी तारेख व्यवस्थापन प्रणाली प्रारम्भ भएको छ ।
प्रधानन्याधीश विश्वम्भरप्रसाद श्रेष्ठले उच्च अदालत पाटनबाट देशभरका उच्च अदालतमा स्वचालित पेसी तारेख व्यवस्थापन प्रणाली प्रारम्भ गर्नुभएको हो ।
उच्च अदालत सात प्रदेशमा सातओटा र अस्थायी इजलास गरी १८ ओटा रहेका छन् । ती सबै अदालतमा आजदेखि उक्त प्रणालीबाट पेसी तारेख ताकिने छ ।
प्रधानन्याधीश श्रेष्ठले अदालतलाई पूर्ण रूपमा प्रविधिमन्त्री बनाउँदा सहज रूपमा सेवाग्राहीले काम गर्न पाउने र सेवामा गुणस्तरीय, पारदर्शिता र विश्वास बढ्ने विश्वास व्यक्त गर्नुभयो ।
‘सर्वोच्च अदालतमा प्रारम्भ गरेर सफल भएपछि उच्च अदालतमा लिइने पेसी तारिक पनि स्वचालित मेसिनबाट गर्ने प्रणाली सुरु गरेका उच्च अदालतमा स्वचालित पेसी तारेख सुरु’ श्रेष्ठले भन्नुभयो– ‘यसप्रति सबैको विश्वास गुणस्तरीयता, पारदर्शिता र विश्वास हुन्छ । यो भनसुनका भरका आग्रह गरेर हुने छैन, न्यायिक इतिहासमा पहिलोपटक उच्च अदालतमा यो प्रणाली प्रारम्भ गरिएको हो ।’
उहाँले सर्वोच्च अदालतकै सूचना प्रविधि महाशाखामा भएको जनशक्तिबाट यो प्रणाली सम्भव भएको भन्दै आगामी दिनमा जिल्ला अदालतमा सुरु गर्नका लागि अध्ययन भइरहेको जानकारी दिनुभयो ।
‘यो प्रणालीबाट पेसी तारिक तोक्दा भेदभाव हुँदैन, अदालत र बार मिलेर गर्नुपर्ने काम प्रभावकारी रूपमा हुन्छ’ प्रधानन्याधीश श्रेष्ठले थप्नुभयो– ‘निकट भविष्यमा सर्वोच्च अदालतमा आफ्नै ल फमबाटै मुद्दा दर्ता गर्न सक्ने प्रणाली व्यवस्था गर्न अध्ययन गरिरहेका छौँ । यो काम अन्तिम चरणमा पुगेको छ ।’
तारिख लिने कामका लागि अदालत जानुनपर्ने व्यवस्था गर्ने तयारी भइरहेको जनाउँदै उहाँले सर्वोच्च, उच्च अदालतमा पनि अनलाइनबाट सुनुवाइ गर्ने व्यवस्था भइरहेको बताउनुभयो ।
बाँकी उच्च, विशेष र श्रम अदालत तथा बैदेसिक रोजगार न्यायाधीकरणमा पनि अनलाइन सुनुवाइ गर्ने व्यवस्था मिलाउने तयारी भइरहेको प्रधानन्याधीश श्रेष्ठले जानकारी दिनुभयो ।
