टेकराज भुसाल
सन्धिखर्क । भूमिकास्थान नगरपालिका १० धनचौर सेङ्लेङ्गमा रहेको सत्यदेवी आधारभूत विद्यालयले ४८ औं वार्षिकोत्सव, अभिभावक भेला तथा पुरस्कार वितरण कार्यक्रम सम्पन्न गरेको छ ।
एक समारोहबीच नगरप्रमुख झविलाल थापाले विद्यालयको वार्षिकोत्सव, अभिभावक भेला तथा पुरस्कार वितरण कार्यक्रमको उद्घाटन गर्नुभएको हो ।
सो अवसरमा बोल्दै नगरप्रमुख थापाले समग्र भूमिकास्थान नगरपालिकाको शैक्षिक अवस्था तथा शैक्षिक गुणस्तर लगानी अनुसारको नभएको भन्दै शैक्षिक गुणस्तर सुधार गर्न विद्यालय, शिक्षक, विद्यार्थी र अभिभावक एकजुट भएर लाग्नुपर्ने बताउनुभयो।
कृषि,पर्यटन र उद्योगलाई आर्थिक मेरुदण्डका रुपमा अघि सारेर भूमिकास्थानले नगरभित्र रहेको बाँझो जमिनमा व्यवसायिक कृषि उत्पादन सञ्चालन गरेको र बेरोजगारहरूलाई गाउँमै काम दिने गरी कर्मशिल जनशक्तिलाई रोजगार दिएको बताउँदै नगरप्रमुख थापाले कृषि, पर्यटन र उद्योगलाई व्यवसायिक बनाउने, भौतिक निर्माण र विकासका काममा समेत युवाहरूलाई क्षमता अनुसारको काम दिने गरी कर्मशिल जनशक्ति परिचालन कार्यक्रम सञ्चालन गरिएको बताउनुभयो।
शिक्षा, युवा तथा खेलकुद शाखा प्रमुख तुवलाल सापकोटाले सत्यदेवी आधारभूत विद्यालय शैक्षिक गुणस्तरमा अन्य विद्यालयको तुलनामा सन्तोषजनक रहेको र आगामी दिनमा अझ थप शैक्षिक गुणस्तर दिनेमा आफू आशावादी रहेको बताउँदै त्यहि अनुसार अघि बढ्न सम्पूर्ण शिक्षक, विद्यालय व्यवस्थापन समिति, विद्यार्थी, अभिभावक र सरोकारवाला सक्रिय हुनुपर्ने बताउनुभयो।
कार्यक्रममा कार्यपालिका सदस्य तथा वडा नं. १० का सदस्य गिरबहादुर नेपाली, वडासदस्य जनकलाल गैरे, विभिन्न विद्यालयका प्रधानाध्यापक, राजनीति दलका प्रतिनिधि र विभिन्न सङ्घसंस्थाका प्रतिनिधिहरूले बोल्दै शिक्षामा गुणस्तर सुधारका लागि सबै एकजुट भएर लाग्नुपर्नेमा जोड दिनु भयो ।
विद्यालयका प्राचार्य विष्णु बन्जाडेले आर्थिक तथा प्रगति प्रतिवेदन प्रस्तुत गर्नुभएको कार्यक्रममा विद्यालयले आन्तरिक रुपमा सञ्चालन गरेका विभिन्न परिक्षा, खेलकुद लगायतका अतिरिक्त क्रियाकलापमा प्रथम, द्वितीय र तृतीय हुने विद्यार्थीलाई पुरस्कार वितरण गरिएको थियो ।
कार्यक्रम विद्यालय व्यवस्थापन समितिका अध्यक्ष हिमनाथ खनालको अध्यक्षतामा सम्पन्न भएको थियो ।
