काठमाडौं । विश्वभरी फैलिएको कोरोना भाइरस संक्रमणको केन्द्र अहिले इटली भएको छ । इटलीपछि स्पेनमा कोरोना संक्रमणको दर उच्च छ ।
इटालीमा पनि बेरगामो सहरलाई यसले सबैभन्दा बढी गाँजेको छ । बेरगामोका मेयर जर्जियो गोरीले फुटबल खेलकै कारण इटाली र स्पेनमा समेत कोरोना महामारी फैलिएको दाबी गरेका छन् ।
युरोपेली च्याम्पियन्स लिगका क्रममा एटलान्टा र भ्यालेन्सियाबीच मिलानको सानसिरोमा भएको खेलकै कारण इटाली र स्पेनमा कोरोना भाइरसले महामारीको रूप लिएको उनको दाबी छ ।
च्याम्पियन्स लिगको अन्तिम १६ को दोस्रो लेगको खेल गत फेब्रुअरी १९ मा भएको थियो । जुन हेर्न त्यस दिन सानसिरोमा ४४ हजारभन्दा बढी दर्शक सहभागी भएका थिए ।
यसैकारण आफ्नो सहर बेरगामो कोरोना महामारीको सबैभन्दा बढी मारमा परिरहेको मेयर गोरीले दाबी गरेको सञ्चार माध्यमहरुले जनाएका छन् । बेरगामाका चिकित्सकले पनि मेयर गोरीकै दाबीमा समर्थन गर्दै त्यही खेलबाट कोरोना संक्रमण व्यापक बनेको बताएका छन्।
मेयर गोरीका अनुसार अनि भ्यालेन्सियाका समर्थकले कोरोना भाइरस आफूसँगै स्पेन पनि पुर्याए।
बीबीसीका अनुसार इटलीमा अहिलेसम्म कोरोना भाइरसका कारण ८ हजार २ सय १५ को मृत्यु भएको छ भने ८० हजार ५ सय ८९ संक्रमित भएका छन् । यस्तै, स्पेनमा ४ हजार ३ सय ६५ जनाको मृत्यु भएको छ भने ५७ हजार ८ सय ६ जना संक्रमित भएका छन् ।
विश्वभर कोरोनाका कारण २४ हजार ७० जनाको मृत्यु भएको छ भने ५ लाख ३१ हजार ९ सय ८० जना संक्रमित भएका छन्।
