काठमाडौं । सांसद अमरेशकुमार सिंहले प्रधानमन्त्री पुष्पकमल दाहाल प्रचण्डकी पुत्री एवम् उनकी स्वकीय सचिव गंगा दाहालले विभिन्न व्यवसायीसँग मोलमोलाई गर्ने गरेको आरोप लगाएपछि प्रधानमन्त्रीको सचिवालयमा खैलाबैला मच्चिएको छ ।

प्रचण्डको सचिवालयबाट अमरेशलाई ‘नाङ्गेझार पार्ने’ भन्दै धम्की दिइएको छ भने आफ्ना सुरक्षागार्डसमेत फिर्ता लगिएको सांसद सिंहले बताएका छ ।

सर्लाहीबाट निर्वाचित सांसद सिंहले गंगा दाहालमाथि विभिन्न व्यापारीसँग रकम बुझ्ने गरेको आरोप सामाजिक सञ्जालमार्फत् लगाएपछि उनीसँग बालुवाटार बिच्किएको हो ।

सिंहले फेसबुकमा लेखेका छन्, ‘प्रधानमन्त्रीकी छोरी तथा स्वकीय सचिव गंगा दाहालले कुनकुन व्यापारीसँग कुनकुन मामिलामा कति रकम बुझेकी छन्, त्यो सबै प्रमाण मसँग सुरक्षित छ। समय आएपछि सबै प्रमाण जनता र मिडियामा लिएर जानेछु।’

सिंहले प्रचण्डपुत्रीले गरेको भ्रष्टाचारको आफूसँग प्रमाण रहेको र मिडियामा सार्वजनिक गरिदिने बहालवाला सांसदको चेतावनीले प्रधानमन्त्री प्रचण्डलाई तनाव भएको छ । सोमबार विभिन्न कार्यक्रममा उनले सांसद सिंहले लगाएका आरोपको खण्डन गर्न निकै समय खर्चिए ।

यस्तै, उनको सचिवालयले चेतावनीसहितको खण्डन गरेको छ । प्रचण्ड सचिवालयका सदस्यहरूले आइतबार साँझ एउटै व्यहोराको लामो स्पष्टीकरण सामाजिक सञ्जालमा राखेका छन् । तिनैमध्येका एक प्रधानमन्त्रीका स्वकीय सचिव रमेश मल्लको फेसबुकमा राखिएको सन्देशमा सिंहले आफ्नो निहित स्वार्थ पूरा नभएपछि प्रधानमन्त्री प्रचण्ड, उनको परिवार र सचिवालयका विरुद्ध झुठको खेती गरेको भनिएको छ।

‘मा. अमरेशकुमार सिंहले आफ्नो निहित स्वार्थ पूरा नभएपछि सम्माननीय प्रधानमन्त्रीज्यू, उहाँको परिवार र सचिवालयका विरुद्ध विद्वेषपूर्ण ढंगले अनर्गल, भ्रामक प्रचार र झुठको खेती गर्दै आएका छन्,’ वक्तव्यमा भनिएको छ, ‘उनको यो अस्वाभाविक प्रस्तुति र अराजनीतिक बार्गेनिङ सरकारको पूर्णतासँगै सुरू भएको तथ्य स्पष्ट नै छ।’

सांसद सिंहले एनसेलको सेयर बिक्री प्रकरणमा प्रचण्ड परिवारको पनि संलग्नता रहेको पनि आरोप लगाएका छन् । सिंहको यो आरोप र गतिविधिको कानुनअनुसार उपचार खोज्ने प्रधानमन्त्रीको सचिवालयले जनाएको छ ।

‘प्रधानमन्त्रीज्यू कोप २८ मा भाग लिन दुबईमा रहेको बेला गरिएको यो किनबेचको प्रपञ्चलाई उहाँ नेपाल आउनेबित्तिकै छानविन र कार्बाहीको प्रक्रिया अघि बढाइएको छ,’ प्रचण्ड सचिवालयको भनाइ छ, ‘छानविन समितिको अध्ययन र छानविनपछि सरकारले प्रचलित कानुनबमोजिम देशको स्वाभिमान र राष्ट्रिय हितलाई केन्द्रमा राखेर आवश्यक निर्णय लिने नै छ।’

प्रचण्ड सचिवालयले सिंहमाथि निहित स्वार्थपूर्ति नभएपछिको प्रलाप भनेको छ तर उनले कुन स्वार्थका लागि के विषयमा माग र मोलमोलाइ गरेका हुन् भनेर खुलाएको छैन।

स्वतन्त्र सांसद सिंहले पछिल्लो समय विभिन्न भ्रष्टाचारका काण्डमा संसद भित्र र बाहिर पनि चर्को स्वरमा आवाज उठाउने गरेका छन् ।
नक्कली शरणार्थी र सुन प्रकरणमा उनले संसदमा चर्को रूपमा आवाज उठाएका थिए।

उनले कांग्रेस सभापति शेरबहादुर देउवाकी पत्नी आरजु राणामाथि पनि राज्यका नियुक्ति, सरुवा, बढुवा, ठेकापट्टा र राजस्वमा चलखेल गरेको, स्वदेशको पैसा विदेश लगेर थुपारेको लगायत आरोप लगाउँदै ‘गणतन्त्रकी पम्फादेवी’ भनेर टिप्पणी गरेका थिए।