काठमाडौं । साविक विजेता काठमाडौं रेजर्सलाई पराजित गर्दै बुटवल लुम्बिनीले नेपाल सुपर लिग (एनएसएल) मा दोस्रो जित दर्ता गरेको छ ।
त्रिपुरेश्वरस्थित दशरथ रंगशालामा शनिबार भएको दोस्रो खेलमा बुटवलले काठमाडौंलाई २–१ ले पराजित गरेको हो।
जितसँगै बुटवल अंक तालिकाको तेस्रो स्थानमा उक्लिएको छ । बुटवलसँग पराजित भएको काठमाडौंको अपराजित यात्रामा भने पूर्णविराम लागेको छ ।
लुम्बिनीको जितमा कप्तान एरिक विष्ट र स्टेफन समिर विनोङले गोल गरे। काठमाडौका राजिव लोप्चनले गरेको गोल शान्त्वना बन्न पुग्यो।
खेलको इन्ज्युरी समयमा राजिव लोप्चनले काठमाडौका लागि गोल फर्काएपनि निकै ढिला भइसकेको थियो। राजिवले किङगे ओलिभरको पासमा गोल गरेका थिए।
खेलको ६१ औं मिनेटमा एरिक विष्टको गोलमा बुटवलले अग्रता दोब्बर पार्यो। जिलेस्पी जगं कार्कीको क्रसमा एरिकले बललाई पोष्टको जाली चुमाएका थिए।
५२ औं मिनेटमा तोजिडिनोभको फ्रिकीक सोखरुमको हेडर पोष्टको माथिबाट बाहिरियो। ४८ औं मिनेटमा टोजीडिनोभको प्रहार पहिलो बारको नजिकबाट बाहिरिदा काठमाडौले बराबरीको सुन्दर मौका गुमायो।
पहिलो हाफको २९ औं मिनेटमा स्टेफन समिर विनोङको गोलमा बुटवलले सुरुआती अग्रता बनाएको थियो। फरवार्ड जिलेस्पीजगं कार्कीको प्रहार स्टेफन समिरलाई लाग्दै गोलमा परिणत भएको थियो।
त्यसअघि २५ औं मिनेटमा हिसुब थपलियाको फ्रिकीक किंगो ओलिभरको हेडरमा लुम्बिनीका डिफेन्डर थेरी विइकले क्लीयर गर्न नसक्दा सोखरुमले गोलमा परिणत गरेपनि रेफ्रि श्याम दनुवारले अफसाइड दिएका थिए।
४५ औं मिनेटमा बुटवलका कप्तान एरिक विष्टको फ्रिकीक काठमाडौका गोलरक्षक अविशेक बरालले पन्च गर्दै बचाए।
३८ औं मिनेटमा काठमाडौंका सोखरुख एम को फ्रिकीक प्रहार लुम्बिनीका गोलरक्षक मोहमदोउले पन्च गर्दै जोगाए।
तेस्रो मिनेटमा नै काठमाडौंका सोखरुख एम को क्रसमा गणेश हमालको प्रहार पोष्टको माथिबाट बाहिरियो।
लिगमा आइतबार एफसी चितवन र ललितपुर सिटी एफसी भिड्नेछन्। सो खेल साँझ ५ बजे सुरु हुनेछ।
