हेटौँडा । मकवानपुरबाट पेस्तोल र गोलीसहित तीन जना पक्राउ परेका छन् ।
जिल्ला प्रहरी कार्यालय मकवानपुरले हेटौंडा उपमहानगरपालिका–४ हुप्राचौरस्थित एक घरको कोठाबाट सेमी अटो मेटिक पेस्तोल १ थान र गोली १९ राउन्डसहित ३ जना पुरुषलाई पक्राउ गरेको हो।
पक्राउ पर्नेमा हेटौंडा उपमहानगरपालिक ९ बस्ने ३३ वर्षीय निश्चल पौडेल, ३५ वर्षीय गणेश घले र ३० वर्षीय प्रितम क्षेत्री रहेका छन्।
शुक्रबार प्रक्राउ परेका उनीहरुलाई जिल्ला प्रहरी कार्यालय मकवानपुरले शनिबार ९आज० पत्रकार सम्मेलन गरेर सार्वजनिक गरेको हो।
यही मंसिर १८ गते हेटौंडा–९ धर्मपथस्थित सूर्यप्रसाद पौडेलको घरमा पटका पड्केको जस्तो आवाज आएपछि १९ गते बिहान उनको घरको वरीपरी गोलीको खोका जस्तो बस्तु फेला परेपछि प्रहरीले अनुसन्धान थालेको थियो।
प्रहरीका अनुसार अनुसन्धानको क्रममा प्रहरीले उक्त घरको पिलर, बिम, रेलिङवालमा गोली लागेको जस्तो दाग फेला पारेको थियो।
प्रहरीले नजिकै रहेको प्रगति स्कुल अगाडिको सडकमा १ राउन्ड गोलीसमेत फेला पारेको थियो। पक्राउ परेकाहरुबाट एक थान सेमि अटोमेटिक पेस्तोल, १९ राउन्ड गोली, एक ग्राम ४ सय मिलिग्राम लागुऔषध तथा अन्य सामग्रीसहित बरामद गरिएको प्रहरीले जनाएको छ।
