डबल बोगटी, सिलगडी ।
गरिबी, अभाव र विभिन्न चुनौतीका बिचमा पनि सङ्घर्ष र मिहिनेतले मानिसलाई सफलताको सिँढीसम्म पुर्याउँछ भन्ने उदाहरण बनेका छन्, डोटी जिल्ला केआइसिंह गाउँपालिका वडा नम्बर ४ निवासी शिवी विक ।
निरन्तर मिहिनेत गर्दै जाँदा जस्तोसुकै कठिनाइलाई पनि चिरेर अगाडि बढ्न सकिन्छ भन्ने कुराको सफल उदाहरण बनेका छन शिवी ।
उनले २०८० सालमा चिकित्सा शिक्षा आयोगले लिएको एम.बी.बी.एस. र बी.डी.एस. छात्रवृत्ति प्रवेश परीक्षामा शत्प्रतिशत नाम निकाल्न सफल भएका छन् ।
उनी एउटा विपन्न दलित परिवारका सदस्य हुन । एकातिर विपन्न आर्थिक अवस्था थियो भने अर्काेतर्फ उनी कक्षा ९ मा पढदै गर्दा उनकी आमा कलसी विकको दुवै मिर्गौला फेल भएर मृत्यु भयो । आमाको मृत्यु हरकसैका लागि निकै पीडादायी हुन्छ । शिवी का लागि पनि उनकी आमाको मृत्यु पीडादायी हुनुका साथै आफ्नो जीवनको सहारा गुमाएको अवस्था थियो ।
ज्यालामजदुरी गरेर साँझबिहानको छाक टार्ने आमा नै नरहेपछि उनको जीवनमा थप चुनौती बढेर गयो । उनका बुबा जोगी लुहारले अहिले पनि गाउँमा सामान्य आरन चलाएर साँझबिहानको छाक टार्ने गरेका छन् ।
शिवी आफ्नो सफलताको श्रेय विशेष गरी आफ्ना आमाबुबा र उनको नजिकका छिमेकी स्थानीय झिमेमालिका माविका प्राचार्य नरबहादुर कार्कीलाई दिन्छन् ।
पुराना दिनको स्मरण गर्दै शिवी ले भने– मेरो हातमा कापिकलम थमाएर आमाबुबालाई सम्झाई बुझाई गरी विद्यालयको ढोकासम्म पुर्याउने कार्की सरलाई म कहिल्यै बिर्सन सक्दिनँ ।
आफूलाई पढाउने र सहयोग गर्ने सबै गुरुप्रति आफू नतमस्तक रहेको प्रतिक्रिया दिए उनले ।
शिवी ले कक्षा ८ सम्मको अध्ययन केआइसिंह गाउँपालिकाको वडा नम्बर ४ मा रहेको स्थानीय झिमेमालिका मावि मा गरेका थिए भने कक्षा ९ देखि एस.ई.ई. सम्मको अध्ययन सोही पालिकाको वडा नम्बर ५ मा रहेको सरस्वती माध्यमिक विद्यालयबाट गरेका थिए । कक्षा ११ र १२ मा पनि उनले काठमाडौँमा रहेको ह्वाइट हाउस कलेजको छात्रवृत्ति कोटामा नाम निकाल्न सफल भई विज्ञान विषय पढेका थिए ।
शिवी डाक्टर बन्न लागेको खबरले उनका आफन्त र उनलाई विगतमा पढाउने शिक्षकहरू निकै खुसी भएका छन ।
झिमेमालिका माविका प्राचार्य कार्कीले आफूले पढाएको विद्यार्थीले सफलता प्राप्त गर्दा एउटा शिक्षक हुनुको नाताले अलौलिक खुसी प्राप्त भएको प्रतिक्रिया दिनुभयो ।
शिवी का बुबा लुहारले हर्षका आँसु चुहाउँदै शिवी डाक्टर हुने खबर सुनेर निकै खुसी लागेको प्रतिक्रिया दिए ।
उनले भने– म पनि बिरामी छु । मेरो छोरो डाक्टर भयो भने मेरो पनि उपचार गरोस् । हामी जस्तै गरिबदुखीको सेवा गरोस भन्ने मेरो चाहना छ ।
