बेइजिङ । यसै साता कारखानाका एक कर्मचारीले कच्चा सामग्रीमा पिसाब गर्दै गरेको भिडियो भाइरल भएपछि चीनको सबैभन्दा ठुलो बियर निर्मातामध्येको एक कम्पनीले उक्त घटनाको अनुसन्धान सुरु भएको जनाएको छ ।
बिहीबार अनलाइनमा प्रकाशित भएको भिडियो क्लिपमा कथित रूपमा सिङ्ताओ बु्रअरी कम्पनीको गोदाममा एक पुरुष कर्मचारीलाई अग्लो पर्खाल भएको कन्टेनरमा चढेर कच्चा सामग्रीमा पिसाब गरिररहेको देखाइएको छ ।
उक्त फुटेज चिनियाँ सामाजिक सञ्जालमा व्यापक रूपमा प्रसार गरिएको छ । यसलाई लोकप्रिय प्लेटफर्म बिबोमा लाखौँपटक हेरिएको छ ।
सिङ्ताओले उक्त घटनालाई लिएर प्रहरीसँग सम्पर्क गरेको र अनुसन्धान जारी रहेको बताएको छ ।
“हाम्रो कम्पनीले बिहीबार सिङ्ताओ ब्रुअरी नम्बर ३ बाट बाहिरिएको प्रासङ्गिक भिडियोलाई धेरै नै महत्त्व दिएको छ” बियर निर्माता कम्पनीले एक विज्ञप्तिमा भनेको छ– “हामीले चाँडै नै प्रहरीलाई घटनाबारे जानकारी गरायौँ र सार्वजनिक सुरक्षा अङ्गहरू अनुसन्धानमा संलग्न भएका छन् । हाल विचाराधीन माल्टको ब्याचलाई पूरै सिल गरिएको छ । कम्पनी आफ्नो व्यवस्थापन प्रक्रियालाई सुदृढ बनाउन र उत्पादनको गुणस्तर सुनिश्चित गर्न निरन्तर अग्रसर छ ।”
केही सामाजिक मिडिया प्रयोगकर्ताले उक्त भिडियोप्रति आक्रोश व्यक्त गर्दै प्रतिक्रिया दिएका छन् र चीनको सबैभन्दा प्रख्यात पेय ब्रान्डमध्येको एक उक्त कम्पनीको समर्थनमा टिप्पणी गरेका छन् ।
‘उक्त व्यक्तिलाई अदालतमा लगेर कम्पनीलाई नोक्सानका लागि क्षतिपूर्ति दिनुपर्छ भन्ने मेरो सुझाव छ’ कम्पनीको प्रतिक्रियामा बिबोमा एक जनाले लेखेका छन् ।
अर्काले लेखेका छन्– ‘यसको गहिरोसँग अनुसन्धान होस् । सधैँ हाम्रो राष्ट्रिय च्याम्पियन ब्रान्डका लागि अगाडि आउनुहोस् ।’ (रासस/एएफपी)
