रवि पौडेल ##

रातो माटो र सेतो कमेरोले घर पोत्न सकिनँ
असोज शुक्ला प्रतिपदा घटस्थापनामा म घर भइनँ
पल्लो भिरमा बाब्बियो काट्न जाने बेला म छैनँ
पखेरी छेउमा पिङ राख्ने बेला म भइनँ

तल गैरामा रुइटे पिङका किला बोक्न पाइनँ
एक छेउमा काध थापी सहयोग गर्न पाइनँ
पर चौरमा लिङेपिङका बास बोक्न पाइनँ
खन्ती समातेर पिङ गाड्ने डोभ खन्न पाइनँ

फूलपाति र जमरा लगाउने दिन मामाघर जान पाइनँ
घरमा सूर्यास्त आमाबाबुको टीका थाप्न पाइनँ
गुरुजन र ठुलाबडासँग आशिर्वाद लिन पाइनँ
बिसौँ वर्ष भयो ससुराली टीका थाप्न पाइनँ

गाउँमा टीका लगाई सेलरोटी र अचार चाखेको
हातभरि सेलरोटी चुरा झँै उनेर हिँडेको
जमरा र अक्षता निधार र कानभरि भिरेको
दसैँ स्वदेश छोडी धेरै भयो विदेशी भूमि कुरेको

पीडा न चाडपर्व न हर्ष र उत्साह परदेशीको
कसरी घर चलाउने मनमा हुन्छ पिरलो
निराश छ स्थिति निराश छ अवस्था
झन् झन् बिग्रदै छ देशको बिग्रदो अवस्था

कसरी मनाऊँ चाड एमसिसी भित्रिएको छ
सङ्घीयताको भारी बोकाई साम्राज्यवादी रमाएको छ
राजतन्त्रका हिमायती गणतन्त्र निल्न खोज्दै छन्
साम्राज्यवादी दुष्ट कालापानी गुन्जी निल्दै छ

सरकार मौन छ साम्राज्यवादी तलुवा चाटेको छ
नेपालआमाको माटोसँग सत्ता साटेको छ
कसरी रमाउँ म चाडपर्व पिरल्नु पिरलेको छ
देशका आफ्ना नागरिक विश्वभरि छिरलेको छ

प्यालेस्टाइन र इजरायल जनताले अधिकार खोजेको छ
न्यायिक युद्धमा सोझो नेपालीले ज्यान गुमाएको छ
ज्यान गयो निर्दाेष नेपालीको पीडा भरिएको छ
कसरी खुसी मनाऊँ मनमा क्रिडा उब्जिएको छ

देश गम्भीर अवस्थामा छ जातीय द्वन्द्व भड्केको छ
देश विदेशीको रणमैदान हुन्छ भन्ने शङ्का उब्जेको छ
देश फिजी बन्ने हो या अफगानिस्तान बन्ने शङ्का छ
चाडपर्व कसरी मनाऊँ अहिले राजनीति रन्को छ

(अक्टोबर १६, २०२३)