काठमाडौँ । राष्ट्रिय जनमोर्चाले इजरायलबाट स्वदेश फर्किन चाहने विद्यार्थी तथा घाइतेलाई तुरुन्तै नेपाल ल्याउने प्रबन्ध गर्न माग गरेको छ ।
अध्यक्ष चित्रबहादुर केसीको हस्ताक्षरमा २०८० असोज २४ गते बुधबार प्रेसवक्तव्य जारी गर्दै राजमोले यस्तो माग गरेको हो ।
मृतकप्रति श्रद्धाञ्जली तथा घाइतेको शीघ्र स्वास्थ्यलाभको कामना व्यक्त गरिएको सो वक्तव्यमा मृतकको शव स्वदेश ल्याउने यथाशीघ्र व्यवस्था गर्न पनि माग गरिएको छ ।
यस्तो छ, वक्तव्यको पूर्ण पाठ :
“इजरायलमाथि हालै हमासले गरेको आक्रमणमा परी नेपालबाट “लर्न एन्ड अर्न” योजनाअन्तर्गत इजरायलको विभिन्न कृषिफर्ममा काम गर्न र सिप सिक्न गएका १० जना विद्यार्थीको मृत्यु, केही घाइते र सम्पर्कविहीन भएको, सुरक्षाका लागि बङ्करमा बस्नुपरेका समाचार आइरहेका छन् । नेपाली विद्यार्थीले आतङ्कपूर्ण दैनिकी व्यहोर्नुपरेको छ ।
घटनामा परी ज्यान गुमाउनेप्रति दलको तर्फबाट हार्दिक श्रद्धाञ्जली व्यक्त गर्दै शोकसन्तप्त परिवारमा गहिरो समवेदना प्रकट गर्दछौँ । घाइतेको शीघ्र स्वास्थ्यलाभको कामना गर्दछौँ । स्वदेश फर्किन चाहने विद्यार्थी तथा घाइतेलाई तुरुन्तै नेपाल ल्याउने प्रबन्ध गरिनुपर्दछ । मृतकको शव स्वदेश ल्याउने यथाशीघ्र व्यवस्था गर्न सरकारसित माग गर्दछौँ ।”
