कपिलवस्तु । राष्ट्रिय जनमोर्चा शिवराज नगर समितिले शिवराज नगरपालिकाको चन्द्रौटामा अगुवा कार्यकर्ता प्रशिक्षण सम्पन्न गरेको छ ।
शनिबार आयोजित नगरस्तरीय कार्यक्रममा ऐतिहासिक तीन अभियानबारे प्रशिक्षण दिइएको थियो ।
राष्ट्रिय जनमोर्चा नगर अध्यक्ष केहरसिंह पुनको अध्यक्षता र बेगम बुढाको सञ्चालनमा अघि बढेको कार्यक्रममा ऐतिहासिक तीन अभियान अन्तर्गत नेपाल कम्युनिष्ट पार्टी स्थापनाको ७५ वर्षको उपलक्षमा हिरक जयन्ती, लेनिनको सयौं स्मृति दिवसका अवसरमा लेनिनले प्रतिपादन गरेका सिद्धान्त र नेकपा (मसाल) को नवौं महाधिवेशनबारे प्रशिक्षण कार्यक्रम सम्पन्न भएको हो ।
कार्यक्रममा रुसको समाजवादी क्रान्ति र लेनिनको जीवनीको बारेमा राष्ट्रिय जनमोर्चाका जिल्ला सचिव तथा अखिल नेपाल ट्रेड युनियन महासंघ (अन्टुक) का केन्द्रीय सदस्य केरसिंह अदैले प्रशिक्षण दिनु भएको थियो ।
यस्तै, नेपालको कम्युनिष्ट आन्दोलनबारे बुद्धिजीवी संघका जिल्ला सदस्य छन्दबहादुर केसी र तत्कालीन राजनीति र राष्ट्रिय जनमोर्चाको सदस्यता अभियानबारे राष्ट्रिय जनमोर्चा जिल्ला कोषाध्यक्ष केहरसिंह पुनले प्रशिक्षण दिनु भएको थियो ।
राष्ट्रिय जनमोर्चा यतिबेला देशव्यापी रूपमा संगठन निर्माण र सदस्यता वितरण अभियानमा जुटेको छ । कपिलवस्तुमा पनि प्रशिक्षण, सदस्यता वितरण तथा संगठन निर्माणका कार्यक्रम भइरहेका छन् ।
