काठमाडौँ । नेकपा (मसाल) ले संविधानसभाका अध्यक्ष, नेकपा (एमाले) का उपाध्यक्ष तथा सांसद सुभाषचन्द्र नेम्वाङको निधनप्रति श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८० भदौ २६ गते मङ्गलबार शोकवक्तव्य जारी गर्दै श्रद्धाञ्जली तथा शोकसन्तप्त परिवारप्रति समवेदना व्यक्त गरेको हो ।
वक्तव्यमा स्मृतिशेष नेम्वाङको संविधानसभाबाट संविधान निर्माणमा तथा नेपालका सामाजिक परिवर्तनमा अटुट प्रतिबद्धता भएको बताइएको छ ।
यस्तो छ, शोकवक्तव्यको पूर्ण पाठ :
“नेकपा (एमाले) का उपाध्यक्ष तथा संसदीय दलका उपनेता कामरेड सुवासचन्द्र नेम्वाङको दु:खद निधनबाट हामी स्तब्ध भएका छौँ । उहाँको निधनप्रति गहिरो दु:ख व्यक्त गर्दै हामीले सन्तप्त परिवारजनप्रति हार्दिक समवेदना व्यक्त गर्दछौँ । यसका साथै उहाँको निधनबाट मर्माहत हुनुपरेकोमा नेकपा (एमाले) प्रति हार्दिक सहानुभूति प्रकट गर्दछौँ ।
कामरेड सुवासचन्द्र नेम्वाङको नेपालको प्रजातान्त्रिक तथा कम्युनिस्ट आन्दोलनमा महत्त्वपूर्ण भूमिका रहेको छ । नेपालको सामाजिक परिवर्तनको आन्दोलनमा उहाँको अटुट प्रतिबद्धता रहेको थियो । २०६२–६३ सालको आन्दोलनपछि सभामुख र संविधानसभा अध्यक्षको हैसियतबाट निर्वाह गरिएको उहाँको भूमिका महत्त्वपूर्ण रहेको छ । त्यसरी नेपालको वर्तमान संविधान निर्माणमा पनि उहाँको महत्त्वपूर्ण भूमिका रहेको कुरा प्रष्ट छ । उहाँको मृत्युबाट देशले बौद्धिक र इमान्दार छवि भएको राजनीतिक व्यक्तित्व गुमाउनुका साथै नेपालको प्रजातान्त्रिक तथा कम्युनिस्ट आन्दोलनमा गम्भीर क्षति पुगेको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
