टेकराज भुसाल, बुटवल ।
भूमिकास्थान नगरपालिकाका नगरप्रमुख झबिलाल थापाले पालिकामा संस्कार र श्रमसहितको शिक्षा कार्यक्रम अघि सारेर दुईओटा विद्यालयमा उक्त कार्यक्रम सञ्चालन गरेको र अन्य विद्यालयमा समेत कार्यक्रम सञ्चालन प्रकिया अघि बढेको बताउनुभएको छ ।
ढाकाबाङ–रुपन्देही सम्पर्क समाजको आयोजनामा २०८० भदौ २२ गते शुक्रबार बुटवल १३ बेलबासमा सम्पन्न तिजमिलन तथा दर खाने कार्यक्रमलाई सम्बोधन गर्दै उहाँले यस्तो बताउनुभएको हो ।
सो अवसरमा मन्तव्य राख्दै नगरप्रमुख थापाले पालिकाभित्र रहेका बाझो जग्गालाई पालिकाले नि:शुल्क कृषकसँग मागेर तीन वर्षदेखि १० वर्षसम्म लिजमा लिएर प्रधानमन्त्री स्वरोजगार कार्यक्रममा रहेको जनशक्तिलाई काममा लगाएर स्थानीय रैथाने खेती उत्पादन गर्ने र त्यसलाई पालिकाले बजारीकरण गर्ने कार्यक्रमसमेत अघि बढेको र तत्काल एक क्विन्टल गहत खेती उत्पादन प्रक्रियासमेत अघि बढेको बताउनुभयो ।
पालिकाले पालिकाभित्र रहेका वृद्धहरूको उत्कृष्ट स्याहारसुसार गर्नेलाई प्रोत्साहनस्वरूप आर्थिकसहित सम्मान गर्ने, वृद्धहरूका लागि प्रत्येक शुक्रबार भजनकीर्तन कार्यक्रम, स्वास्थ्यकर्मीहरू जेष्ठ नागरिकको घर घरमा गएर स्वास्थजाँच कार्यक्रम, गर्भवती महिलालाई प्रत्येक तीन/तीन महिनामा नि:शुल्क अल्ट्रासाउन्ड सेवाको व्यवस्था गरेको थापाले बताउनुभयो ।
उपप्रमुख बालकृष्ण बन्जाडे, नगरप्रवक्ता तथा वार्ड नम्बर ४ का अध्यक्ष पन्थीसुनार, वडा नम्बर २ का अध्यक्ष थापाले बोल्दै नगरपालिकाभन्दा बाहिर रहेका आफ्ना जनतासँग समन्वय, सहकार्य र सुझावका आधारमा भूमिकास्थान नगरपालिकालाई समृद्ध नगरको रूपमा विकास गर्दै पालिकालाई भ्रष्टाचारमुक्त र शुसासन कायम भएको नगरको रूपमा विकास गर्ने दाबी गर्नुभयो ।
कार्यक्रममा भूमिकास्थान–रुपन्देही सम्पर्क समाजका अध्यक्ष लक्ष्मण बेलबासे र संस्थाका सल्लाहकार कमलप्रसाद खनालको विशेष उपस्थितिमा रहेको थियो ।
अर्घाखाँची जिल्लाको भूमिकास्थान नगरपालिका वडा नम्बर १ र २ साविक ढाकाबाङ गाविसबाट विभिन्न सिलसिलामा रुपन्देहीमा बसोबास गर्नेहरूका माझ स्थापना भएको ढाकाबाङ–रुपन्देही सम्पर्क समाजले सो कार्यक्रमको आयोजना गरेको थियो ।
संस्थाका सहसचिव टेकराज भुसालको राष्ट्रिय झण्डा अभिवादन वाचनपछि सुरु भएको कार्यक्रममा संस्थाका अध्यक्ष कृष्णप्रसाद खनालको अध्यक्षता तथा सचिव नारायणप्रसाद भुसालको सञ्चालन तथा सदस्य जुना खनालको स्वागत मन्तव्य रहेको थियो ।
कार्यक्रममा सहभागीहरूले पुरानो संस्कृति झल्किने गरी मादल बजाएर गाउकै सम्झना झल्किने गरि नाचगान समेत गरेका थिए ।
