काठमाडौँ । अखिल नेपाल किसान महासङ्घ (अप्फा) सहितका चार किसान सङ्गठनले आफूहरू एम.सी.सी. विरोधी आन्दोलनसित एकाकार हुने बताएका छन् ।
एम.सी.सी. ले नेपाल देश र नेपाली जनताको मानमर्दन गर्ने, छिमेकी देशसित नेपालको पररष्ट्र सम्बन्धमा खलल पुर्याउने र अन्तत: नेपाललाई युद्धमैदानमा परिणत गर्ने विश्लेषण गर्दै उनीहरूले यस्तो निर्णय गरेका हुन् ।
२०८० भदौ १५ गते शुक्रबार संयुक्त प्रेसवक्तव्य जारी गर्दै चार किसान सङ्गठनले एम.सी.सी. फिर्ता गराउन आन्दोलनलाई उचाइमा पुर्याउनुपर्ने आवश्यकतामा जोड दिएका छन् ।
अखिल नेपाल किसान महासङ्घ (अप्फा) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी) का अध्यक्ष सीताराम तामाङ, अखिल नेपाल किसान यूनियनका अध्यक्ष रामदुलार महतो र अखिल नेपाल प्रगतिशील किसान सङ्घका अध्यक्ष दुर्गाप्रसाद जैसीको हस्ताक्षर रहेको प्रेसवक्तव्यको पूर्ण पाठ यस्तो रहेको छ :
“नेपालको राष्ट्रिय स्वाधीनता, सार्वभौमिकता, संविधान र असंलग्न परराष्ट्र नीतिको मर्म र भावना विपरीत रहेको अपमानजनक एम.सी.सी. सम्झौताका विरुद्ध नेपाली जनताका विभिन्न तह र तप्काका सचेत जनसमुदायको व्यापक विरोध हुँदाहुँदै व्याख्यात्मक टिप्पणीको पर्दा हालेर पारित गरिएको राष्ट्रघाती त्यो एम.सी.सी. सम्झौताका विरुद्ध अहिले पनि नेपाली किसानको सचेत तप्कासहित व्यापक जनअसन्तोष र विरोध व्याप्त छ ।
यस परिप्रेक्ष्यमा विद्यमान राष्ट्रव्यापी असन्तोषका बिच त्यस्तो अपमानजनक सम्झौता लागु गर्न र नेपाललाई बाह्य शक्तिको खेलमैदान बनाउने स्थान दिन खोज्नुले आफ्नो अस्तित्वदेखि वर्तमानसम्म बाह्य शक्ति प्रत्यक्ष उपनिवेश बन्नुनपरेको नेपाल र नेपाली जनतालाई पराधीनताको पासोमा पार्ने तारतम्यमा फसाउँदै लगिएको प्रष्ट देखिन्छ ।
अत: नेपाल र नेपालीको मानमर्दन गर्ने, छिमेकी देशसहितको नेपालको पररष्ट्र सम्बन्धमा खलल पुर्याउने र अन्तत: नेपाललाई युद्धमैदानमा परिणत गर्ने यो सम्झौता ससम्मान फिर्ता गराउन हामी चार किसान सङ्गठनहरू जोडदार माग गर्दछौँ अन्यथा साम्राज्यवाद विरुद्ध नेपाली जनताका अन्य तह र तप्काका सङ्घर्षशील जनसमुदायसँगै हामी पनि एकाकार भएर जानुको कुनै विकल्प नरहने कुरा प्रष्ट छ ।”
