काठमाडौँ । बैदेसिक रोजगारीका लागि ग्रिस गएका एक नेपालीलाई अपहरण गरी फिरौती रकम लिने चार जनालाई प्रहरीले पक्राउ गरेको छ ।
प्रहरीको केन्द्रीय अनुसन्धान ब्युरोले उनीहरूलाई काठमाडौँको गैरीघाटबाट फिरौतीको २१ लाख ७५ हजार रुपैयाँसहित पक्राउ गरेको हो ।
पक्राउ पर्नेमा धनकुटाका ३२ वर्षीय शिवराज कुँवर, काठमाडौँका ५६ वर्षीय रामेश्वर अर्याल, हाल बैदेसिक रोजगारको सिलसिलामा दुबई रहेका कपिलवस्तुका ३२ वर्षीय प्रकाश बेलबासे र पर्वतका ४२ वर्षीय दिलबहादुर थापा रहेका छन् ।
प्रहरीका अनुसार गत जेठ १२ गते मोरङको रङ्ेगेली नगरपालिका–२ बस्ने यदुराज थापाको छोरी वर्ष २५ की सावित्रा थापा, उदयपुर जिल्लाको त्रियुगा नगरपालिका–३ बस्ने तिलकबहादुर कार्कीको छोरा कृष्ण कार्की र काभ्रेपलाञ्चोकको नमोबुद्ध–१ मथुरापाटी बस्ने वर्ष ३० को पोखनाथ सत्यालको छोरा राजन सत्याल एकसाथ नेपालबाट सिजनल भिसामा बैदेसिक रोजगारको सिलसिलामा सर्बिया गएका थिए ।
सर्बियामा चित्तबुझ्दो रोजगार तथा तलब सुविधा नपाएको कारण पुन: लुकीछिपी ग्रीस प्रवेश गरे । त्यस क्रममा हिन्दी भाषा बोल्ने अपरिचित पाकिस्तानी भन्ने खुल्न आएका व्यक्ति तथा उसको सहयोगीसमेतले उनीहरूलाई अपहरण गरी डोरीले बाँधेर शारीरिक तथा मानसिक यातना तथा डरत्रास देखाई, ज्यान मार्ने धम्की दिएर पीडितको नेपालमा रहेका परिवारसँग १५ हजार युरो फिरौती माग गरे । त्यसबारे पीडितका आफन्तले प्रहरीको केन्द्रीय अनुसन्धान ब्युरोमा जानकारी दिएपछि प्रहरीले सो सम्बन्धमा अनुसन्धान सुरु गरेको थियो ।
ग्रीस तथा दुबईबाट ह्वाट्सएपमार्फत पीडितका परिवारलाई सम्पर्क गरी २१ लाख ७५ हजार रुपैयाँ नेपालमा फिरौती रकम लिएको प्रहरीले जनाएको छ । घटनामा संलग्न रहेका चारै जनालाई भदौ २ गते काठमाडौँको गौरिघाट डेरा कोठाबाट फिरौती रकमसहित प्रहरीले नियन्त्रणमा लिएको हो ।
त्यसका साथै, ग्रीसमा बन्धक बनाई राखेका पीडितसमेतलाई सकुशल उद्धार गर्न प्रहरी सफल भएको छ ।
प्रहरीले बैदेसिक रोजगारीको लागी विदेश जाँदा नेपाल सरकारको श्रम स्वीकृती भएको देशहरूमा मात्र आवश्यक कानुनी प्रकिया पूरा गरी जान आग्रह गरेको छ ।
