सरस्वती गायक ##

वर्षदिनको तिजमा हजुरसामु आ’की छु
मनमा ला’को दुईचार कुरा भन्न ला’की छु ।
डिग्री पास गरे पनि जागिर हाम्लाई मिल्दैन
बल्लतल्ल मिले पनि पानी चल्दैन ।।

यिनी सबै भेदभाव सामन्तले गरेको
त्यसैले त दलित तप्का पछि परेको ।
दलितबिना लुगाफाटो चुलोसम्म बल्दैन
अनि हाम्रो हातको पानी किन चल्दैन ?

काट्यो भने हाम्रो पनि रगत रातो हुन्छ नि
भेदभाव गर्दा हाम्रो पनि मन रुन्छ नि ।
आजसम्म सरकारले खै के छ गरेको ?
हेरी बस्छ लाखौँ युवा विदेश पसेको ।।

रहर हाम्लाई कहाँ थियोे विदेशमा जानलाई
गाउँमा बसे धौ धौ हुन्छ दुई छाक खानलाई ।
गाउँमा वृद्ध बाबाआमा बिचल्ली भ’का छन्
रोजगार खोज्दै युवाहरू विदेश ग’का छन् ।।

देशमा रोजगार भएदेखि विदेश किन गइन्थ्यो
आफ्नै देशको स्वच्छ हावा पानी खाइन्थ्यो ।
विदेशमा भाषा बुझ्न कति गाह्रो हुन्छ नि
आफ्नो गाउँघर सम्झिँदा मन रुन्छ नि ।।

आधाभन्दा बढी छन् विदेश करिबमा
सरकारको ध्यान जान्न दुखीगरिबमा ।
ठुला नेताहरूलाई भने जस्तो भा’को छ
देशमा धेरै भ्रष्टाचार बढ्दै गा’को छ ।।

आधाभन्दा बढी युवा विदेशतिर गएका
देशमा भएका ठुला ठाला टाउके भएका ।
आफ्ना लागि सरकारले गर्नु पर्ने गरेछ
हामी जस्ता दुखी गरिब रुनु पर्‍या छ ।।

हेरि बस्छन् भन्सारमा क्विन्टल सुन छिराउँदा
पत्तो छैन गरिबदुखी जनता कराउँदा ।
सबै जना मूल प्रवाहमा सङ्गठित भएर
यिनलाई नियन्त्रण गरौँ देशमा गएर ।।