सम्झना थापामगर ##
–१–
बाँझो रहेका जमिनमा खेती गरे कसो होला ?
मिहेनत गरी पसिनाको बिउ छरे कसो होला ?
अर्काको देशमा जानुभन्दा आफ्नै देशमा
दस नङग्रा खियाएर भकारी भरे कसो होला ?
–२–
टलक्क टल्किने हिमाल हेर कति राम्रो
मयूरको त्यो नृत्यचाल हेर कति राम्रो !
जति हेरे पनि हेरूँ लाग्ने मनै लोभ्याउने
प्राकृतिले भरिपूर्ण नेपाल हेर कति राम्रो !
–३–
अन्यायमा परेकालाई न्याय दिनुस् सरकार
पापी कुलङ्गाहरूलाई सजाय दिनुस् सरकार
हत्या हिंसा र बलात्कार भइरहेछ दिनहुुँ
दीर्घकालीन समस्याको उपाय दिनुस् सरकार
–४–
कैयौँ घुम्तीहरूमा हेर अप्ठ्यारो लाग्छ
धुँवा देखिँदैन तर पनि अँध्यारो लाग्छ
सबैतिर बिजुली बत्तीहरू नपुगेता पनि
मेरो देश मलाई प्राणभन्दा प्यारो लाग्छ
–५–
खुकुरीमा धार लगाउनुपर्छ अब हामीले
दुस्मनलाइ पार लगाउनुपर्छ अब हामीले
मातृभूमिको रक्षा गर्न जागौँ नेपाली हो
सिमानामा तार लगाउनुपर्छ अब हामीले
–६–
कसले भन्यो मान्छे मान्छेबिच छुन्छ भनेर
एकअर्कोको खुट्टा तानेर जालो बुन्छ भनेर
मानिस ठुलो दिलले हुन्छ जातले हुँदैन यहाँ
बुझ्नुस् काटे रगत सबैको एउटै हुन्छ भनेर
–७–
मिल्छ भने पायक पर्ने ठाउँमा स्कुल बनाइदिनुस्
मिल्दैन भने तुइन हटाई मजबुत पुल बनाइदिनुस्
ज्यान जोखिममा पारेर कहिलेसम्म नदी तर्नू ?
ए सरकार ! यो समस्या चाँडो निर्मूल बनाइदिनुस्
(पुतलीबजार नगरपालिका–७ साधीँखोला, स्याङजा लेखिका थापामगर अखिल नेपाल प्रगतिशील लेखक सङ्घ गण्डकी प्रदेश कोषाध्यक्षसमेत हुनुहुन्छ ।)
