काठमाडौं । संसदको अवरोध खोल्ने विषयमा प्रतिपक्षी दल नेकपा (एमाले) तयार नभएपछि संसद बैठक नै नबसी स्थगित भएको छ ।
संसद् अवरोध खोल्न राष्ट्रिय मान्यता प्राप्त ७ राजनीतिक दलहरूको बैठक बसेपनि सहमति नजुटेको हो ।
प्रधानमन्त्री पुष्पकमल दाहाल प्रचण्डले आइतबार सिंहदरबारमा राखेको सर्वदलीय बैठकमा संसदलाई लामो समय अवरुद्ध गर्न नहुने निष्कर्ष निकाल्दै दलहरू संसद्को गतिरोध हटाउन सहमति नजिक पुगेको नेकपा (एमाले) का उपनेता सुवास नेम्वाङले जानकारी दिए ।
बैठकमा सहमति जुट्न नसकेपछि प्रतिनिधिसभा बैठक बस्दै नबसी मंगलबार दिउँसो ३ बजेसम्मका लागि सरेको छ। आइतबार दिउँसो १ बजेका लागि बोलाइएको बैठक सरेको सभामुखको सचिवालयले सूचना टाँस गरी जानकारी गराएको छ।
दलहरूभित्र छलफल गरेर पुन: सोमबार सर्वदलीय बैठक बस्ने पनि उनले जानकारी दिए।
बैठकमा प्रधानमन्त्रीसहित नेपाली कांग्रेसका सभापति शेरबहादुर देउवा, एमाले दलका उपनेता नेम्वाङ र पमुख सचेतक गिरी, राष्ट्रिय स्वतन्त्र पार्टीका सभापति रवि लामिछाने, उपप्रधान तथा कांग्रेस उपसभापति पूर्णबहादुर खड्का, राष्ट्रिय प्रजातन्त्र पार्टीका अध्यक्ष राजेन्द्र लिङ्देन र उपप्रधानमन्त्री नारायणकाजी श्रेष्ठ पनि सहभागी थिए।
गत १० साउनदेखि प्रमुख प्रतिपक्षी दल नेकपा एमालेले संसद् लगातार अवरोध गर्दै आएको छ। त्रिभुवन अन्तर्राष्ट्रिय विमानस्थल परिसरबाट बरामद भएको सुन प्रकरणमा उच्चस्तरीय छानबिन समिति बनाउनुनर्पे माग राख्दै एमालेले संसद्मा अवरोध गर्दै आएको हो।
