टेकराज भुसाल, बुटवल ।
पहिलो पाइला नेपाल बुटवल शाखाको आयोजनामा नवीन औद्योगिक कदरबहादुर रिता माध्यमिक विद्यालयमा लागुऔषध दुव्र्यसनी, डेङ्गु तथा आँखा पाक्ने रोग रोकथाम, सजगता तथा उपचारसम्बन्धी सचेतना कार्यक्रम सम्पन्न गरेको छ ।
२०८० भदौ १ गते विद्यालयको विज्ञान, व्यवस्थापन, शिक्षा र कानुन सङ्कायका करिब ५०० विद्यार्थीलाई वडा प्रहरी कार्यालय रामनगरका प्रमुख प्रहरी निरीक्षक अर्जुन पौडेल र लुम्बिनी प्रादेशिक अस्पताल बुटवलका डाक्टर शम्भु खनालले सचेतना मूलक प्रशिक्षण दिनुभएको हो ।
प्रशिक्षण दिँदै वडा प्रहरी कार्यालय रामनगरका प्रमुख प्रहरी निरीक्षक अर्जुन पौडेलले लागुऔषध दुव्र्यसनीमा युवा तथा विद्यार्थीहरू बढी मात्रामा फस्ने गरेको बताउँदै लागुऔषध दुव्र्यसनीका असर, बच्ने उपाय र कानुनी कारबाहीका बारेमा भिडियोमार्फत प्रशिक्षण दिनुभएको थियो ।
त्यस्तै, लुम्बिनी प्रादेशिक अस्पताल बुटवलका डाक्टर शम्भु खनालले डेङ्गु तथा आँखा पाक्ने रोगको बारेमा विस्तृतमा जानकारी गराउँदै रोगबाट बच्न अपनाउनुपर्ने सचेतना, रोकथाम तथा उपचारका बिषयमा जानकारी गराउनुभएको थियो ।
प्रशिक्षक खनालले डेङ्गु तथा आँखा पाक्ने रोग भाइरल हुँदै गएको र यसले ठुलो रूप लिन सक्ने भन्दै सचेत तथा रोकथामका उपाय अबलम्वन गर्दा यसबाट बच्न सकिने बताउनुभयो ।
विद्यालयका प्राचार्य प्रेमबहादुर बस्नेत, पहिला पाइला नेपालका केन्द्रीय वरिष्ठ उपाध्यक्ष आयुष पौडेललगायतको उपस्थिति रहेको कार्यक्रम पहिलो पाइला नेपाल बुटवल शाखाका अध्यक्ष विनोद बस्यालको अध्यक्षता, सहसचिव मनिष खनालको सञ्चालन र वरिष्ठ उपाध्यक्ष सन्तोष बन्जाडेको स्वागतमा सम्पन्न भएको थियो ।
