बेइजिङ । उत्तरी चीनको हेबेई प्रान्तमा भर्खरै आएको भिषण वर्षाका कारण उत्पन्न बिपतमा परी बिहीबारसम्म २९ जनाको मृत्यु भएको छ भने १६ जना बेपत्ता भएका छन् ।
स्थानीय अधिकारीहरूले शुक्रबार जानकारी दिएअनुसार अविरल वर्षा र भिषण बाढीले प्रदेशका ११० जिल्लाका विभिन्न सहरमा व्यापक क्षति पुर्याएको छ ।
शुक्रबार बिहान आयोजित पत्रकार सम्मेलनमा दिइएको जानकारीअनुसार बिपत् प्रभावित क्षेत्रमा यातायात, विद्युत्, सञ्चार, खानेपानीलगायतका पूर्वाधारमा क्षति पुगेको छ । योसँगै प्रान्तले ९५.८१ बिलियन युआन (लगभग १३.३८ बिलियन अमेरिकी डलर) को प्रत्यक्ष आर्थिक क्षति व्यहोरेको बताइएको छ । साथै प्रकोप सृजित क्षतिको समग्र मूल्याङ्कन र प्रमाणीकरण कार्य भइरहेको पनि बताइएको छ ।
बिहीबारसम्म बाढीबाट करिब ३० लाख ८९ हजार मानिस प्रभावित भएका छन् । साथै कुल ३१९,७०० हेक्टर बाली प्रभावित भएको छ भने १ लाख ३१ हजार ५०० हेक्टर क्षेत्रफल खेतियोग्य भूमिमा क्षति पुगेको छ ।
प्रकोपबाट ४० हजार ९०० घरहरू भत्किएका छन् भने १,५५,५०० घरहरू नराम्ररी क्षतिग्रस्त भएका छन् । शिशु शिक्षालयसहित १ हजार १ सय ५० प्राथमिक र माध्यमिक विद्यालयमा क्षति पुगेको छ । (रासस–सिन्ह्वा)
