काठमाडौं । गत पुस २५ गते बागमतीको मुख्यमन्त्रीमा नियुक्त भएका शालिकराम जम्मकट्टेलले गरेको पहिलो निर्णय थियो, प्रदेशमा मन्त्रालय संख्या घटाउने ।
मितव्ययिता अपनाउन मन्त्रालय घटाउने भन्दै मुख्यमन्त्री जम्मकट्टेलले तत्कालिन प्रमुख प्रदेश सचिव मुकुन्द प्रसाद निरौलाको संयोजत्वमा एक अध्ययन समिति बनाए । समितिले माघ १० गते १४ बाट तीन मन्त्रालय समायोजन गरेर ११ मन्त्रालय बनाउन उपयुक्त हुने प्रतिवेदन दियो । सोही प्रतिवेदनका आधारमा जम्मकट्ट्लले तीनवटा मन्त्रालय घटाए ।
तर, पहिलो निर्णयमा हस्ताक्षर गरेको ६ महिना पनि मुख्यमन्त्री जम्मकट्टेल अड्न सकेनन् । उनले भागबण्डा मिलाउन मन्त्रालय टुक्र्याएर फेरि एक मन्त्रालय थपेका छन् ।
११ मन्त्रालय रहेको बागमतीमा गठबन्धनमा रहेका दललाई भाग पुर्याउन १२ मन्त्री नियुक्त गरिँदा भागबन्डा मिलाउन मन्त्रालय टुक्र्याइएको हो । गत जेठ ७ गते बिनाविभागीय मन्त्री नियुक्त गरिएका कांग्रेसका रामकृष्ण चित्रकारलाई विभागीय जिम्मेवारी दिन हाल रहेका ११ मन्त्रालय टुक्र्याएर १२ पुर्याइएको हो।
उद्योग पर्यटन तथा सहकारी मन्त्रालय र मुख्यमन्त्री तथा मन्त्रिपरिषद्को कार्यालयको जिम्मेवारीमा रहेको सामान्य प्रशासन मन्त्रालय छुट्याएर उद्योग तथा सामान्य प्रशासन मन्त्रालय बनाइएको हो ।
