मस्को । युक्रेनी ड्रोनले रुसको सीमावर्ती क्षेत्र ब्रायन्स्कको एक प्रहरी चौकीमा आइतबार रातभर आक्रमण गरेको तर कुनै पनि व्यक्तिको मृत्यु नभएको क्षेत्रीय गभर्नरले सोमबार बताउनुभएको छ ।
अलेक्जेन्डर बोगोमाजले टेलिग्राममा भन्नुभएको छ– ‘युक्रेनी सेनाले ट्रब्चेभ्स्की जिल्लामा राति आक्रमण गरेको छ । यस जिल्लाको प्रहरी चौकीमा एउटा ड्रोन ठोक्किएको थियो । आक्रमणबाट झ्याल र छानामा क्षति पुगेको छ तर कुनै हताहती भने भएको छैन ।’
मस्को र क्रिमिया प्रायद्वीपलाई लक्षित गरी युक्रेनी ड्रोन खसालिएको र यसले राजधानीका दुई कार्यालय टावरमा क्षति पुर्याउनुका साथै एउटा अन्तर्राष्ट्रिय विमानस्थलमा केही समयका लागि उडान अवरूद्ध भएकोे रुसले जनाएको छ ।
मस्कोलाई लक्षित गरी बनाइएको एउटा ड्रोन सहरको बाहिरी इलाकामा खसालेको र अन्य दुई ड्रोनलाई इलेक्ट्रोनिक वारफेयरले दबाएर कार्यालय परिसरमा खसालेको रुसी रक्षा मन्त्रालयले जनाएको छ ।
युक्रेनी सीमाबाट करिब ५०० किलोमिटर (३१० माइल) टाढा रहेको मस्को र यसको वरपरको इलाकालाई युक्रेनमा जारी द्वन्द्वका बेला यस वर्ष कैयौँ ड्रोन आक्रमण भए पनि यसले कमै मात्रमा मानवीय निसाना बनाएको थियो । (रासस/एएफपी)
