केरसिंह अदै, तौलिहवा ।
कपिलवस्तुको शिवराज नगरपालिकामा राष्ट्रिय जनमोर्चाको दोसो नगर सम्मेलन सम्पनन भएको छ ।
राजमो केन्द्रीय सल्लाहकार चन्द्रबहादुर केसीको प्रमुख आतिथ्यमा २०८० साउन १३ गते शनिबार चन्द्रौटामा सम्मेलन सम्पन्न भएको हो ।
नगर अध्यक्ष केहरसिंह पुनको अध्यक्षतामा अगाडि बढेको सम्मेलनको उद्घाटन गर्दै नेता केसीले सङ्घीयताको अर्थ विभाजित जाति, क्षेत्रलाई जोड्नु भएकोमा नेपालमा यसको ठिक विपरीत समाजलाई टुक्राउने काम भइरहेको बताउनुभयो ।
राजमोले सुरुदेखि नै सङ्घीयताको विरुद्ध सङ्घर्ष गर्दै आएको बताउँदै उहाँले अहिले व्यवहारमा नै सङ्घीयता असफल भएको दाबी गर्नुभयो ।
सम्मेलनमा राष्ट्रिय जनमोर्चा जिल्ला सल्लाहकार केरसिंह अदैले मन्तव्य राख्दै राष्ट्रियता, गणतन्त्र, धर्मनिरपेक्षताको रक्षा तथा सङ्घीयताको खारेजीका लागि राजमोले गरेको सङ्घर्षबारे चर्चा गर्नुभएको थियो ।
राजमो जिल्ला कोषाध्यक्ष चेतनारायण खनाल, जातीय समता समाजका जिल्ला अध्यक्ष दिलबहादुर विक, अखिल नेपाल बुद्धिजीवी सङ्घका जिल्ला सदस्य छन्दबहादुर केसी र अखिल नेपाल महिला सङ्घकी जिल्ला सहसचिव बिनिता अदैले सम्मेलनलाई शुभकामना दिनुभएको थियो ।
सम्मेलनले केहरसिंह पुन अध्यक्ष रहनुभएको राजमोको शिवराज नगर समिति चयन गरेको छ ।
समितिको उपाध्यक्षमा मोहन विक, सचिवमा श्यामप्रकाश खनाल, सहसचिव बिनिता अदै र कोषाध्यक्षमा कर्मराज चौधरी रहनुभएको छ ।
त्यसैगरी, सदस्यहरूमा रामप्रसाद कामी, बेगम बुढा, प्रकाश विक, झकबहादुर विक, हुसेन मुल्ला र श्याममोहन केवट, रहनुभएको छ ।
त्यस्तै, वैकल्पिक सदस्यमा बेलाउता विक र शिवप्रसाद थारू तथा सल्लाहकारमा केरसिंह अदै, छन्दबहादुर केसी, चेतनारायण खनाल, तिलक गैरे, दिलबहादुर विक, भूवन खनाल, रहिस कुजदा र प्रेम आचार्य रहनुभएको छ ।
सम्मेलनपछि बसेको समितिको बैठकले पाँच सदस्सीय सचिवालय गठन, सङ्गठनात्मक अभियान, वडा नं. १ मा साउन २० गते, वडा नं. ५ मा साउन २८ गते, वडा नं ३ को भदौ २ गते वडा सम्मेलन गर्ने तथा अन्य वडाहरूमा बैठक, भेला गर्ने निर्णय गरेको बताइएको छ ।
त्यस्तै, समितिको बैठकले राष्ट्रियता, गणतन्त्र र धर्मनिरपेक्षताको रक्षाका लागि सङ्घर्ष गर्ने, सुकुम्बासी समस्याको बारेमा सङ्घर्ष गर्ने, पर्यावरण संरक्षणका लागि सङ्घर्ष गर्ने, भष्टाचार, महङ्गी, मिटरब्याज समस्या विरुद्ध सङ्घर्ष गर्ने र राजमोको जिल्ला सम्मेलन सफल पार्न सहयोग गर्नेलगायतका निर्णय गरेको अध्यक्ष केहरसिंह पुनले जानकारी गराउनुभएको छ ।
