मस्को । रुसी राष्ट्रपति भ्लादिमिर पुटिनले आइतबार प्रकाशित एक अन्तर्वार्तामा युक्रेनले क्लस्टर बम जस्ता हतियार प्रयोग गर्ने हो भने जवाफ दिन आफ्नो देशसँग पनि पर्याप्त मात्रामा विष्फोटक हतियार रहेको बताउनुभएको छ ।
युक्रेनले अमेरिकाबाट क्लस्टर हतियार प्राप्त गर्न थालेको सन्दर्भमा तत्क्षण विष्फोट हुन नसक्ने क्लटर बमले नागरिकमा निम्त्याउने दीर्घकालीन जोखिमप्रति सर्वत्र र चिन्ता चासो व्यक्त गरिएको हो ।
अमेरिकाले निर्यात गरेका विवादास्पद हतियार लामो समयसम्म विस्फोट नभई त्यसै रहने हुँदा त्यो जनसाधारणका निम्ति गमभीर जोखिम हुने बताइएको छ ।
‘रसियासँग विभिन्न प्रकारका क्लस्टर हतियारको पर्याप्त भण्डार छ’ राष्ट्रपति पुटिनले एक सरकारी टेलिभिजनका पत्रकारलाई भन्नुभएको छ ।
उहाँले भन्नुभयो– ‘यदि क्लस्टर बम हाम्रा विरुद्ध प्रयोग भएमा त्यसको बदलामा हामी पनि जवाफ दिन सक्छौँ । त्यो हाम्रो अधिकार हो । देशलाई त्यस्ता हतियार आवश्यक परे पनि अहिलेसम्म हामीले त्यसको प्रयोग गरेका छैनौँ ।’
रुसले युद्ध मैदानमा क्लस्टर हतियार प्रयोग गरेको आरोप ह्युमन राइट्स वाच र युक्रेनी सेनाले लगाएका छन् । क्लस्टर हतियारमाथि धेरै देशले प्रतिबन्ध लगाएका छन् । विशेष गरी युरोपमा त्यो अवैधानिक मानिन्छ । ओस्लो महासन्धिअनुसार पनि त्यसको प्रयोग गैरकानुनी हो तर दु:खको कुरा, रुस, अमेरिका र युक्रेन उक्त महासन्धिका पक्षराष्ट्र होइनन् ।
यसैबिच, मानवतावादी संस्थाहरूले क्लस्टर हतियार प्रयोगको निन्दा गरेका छन् । उनीरूले युक्रेनलाई त्यस्ता हतियार उपलब्ध गराउने अमेरिकी निर्णयको पनि भत्र्सना गरेका छन् ।
यता, अमेरिकी राष्ट्रपति जो बाइडेनले युक्रेनलाई त्यस्ता हतियार उपलब्ध गराउने कठिन निर्णय आफूबाट भएको बताउनुभएको छ । युक्रेनको रित्तिएको गोलाबारुद भण्डारलाई भरथेगका निम्ति अप्रिय निर्णय गर्नुपरेको उहाँले सार्वजनिक रूपमा भन्दै आउनुभएको छ । (रासस/एएफपी)
