काठमाडौँ । ओरेन्टल बचत तथा ऋण सहकारी संस्थाका बचतकर्ताको रकम फिर्ता हुने सम्भावना बढेको छ ।
सञ्चालक सुधीर बस्नेतले सहकारी व्यवस्थापन समिति विरुद्ध दायर गरेको रिट फिर्ता लिएपछि बचत फिर्ता गर्ने बाटो खुलेको दाबी गरिएको हो ।
बस्नेतले सहकारी व्यवस्थापन समितिसँगको छलफलमा सर्वोच्चमा दायर रिट फिर्ता लिएर बचतकर्ताको पैसा फिर्ता गर्न तयार भएका छन् ।
उनले जेठ मसान्तमा नै समितिसँग सहमति गर्दै मुद्दा फिर्ताको लागि सर्वोच्च अदालतमा निवेदन दिएको समस्याग्रस्त सहकारी व्यवस्थापन समितिका सदस्यसचिव केशवप्रसाद पौडेलले बताए ।
बस्नेतको निवेदनअनुसार सर्वोच्च अदालतले असार १३ गते सो रिट निवेदन खारेज गर्दै सहकारीको बचतकर्ताको पैसा फिर्ता गर्ने बाटो खोलिदिएको हो ।
मुद्दा फिर्ता भएसँगै असार २७ गते बसेको समितिको बैठकले तीनओटा निर्णयसमेत गरेको छ । सोही निर्णयानुसार एक लाखसम्म बचत रहेको साना बचतकर्तालाई साउन १५ गतेदेखि बचत फिर्ता गर्ने निर्णय भएको समितिका सदस्यसचिव पौडेलले बताए ।
सरकारले २०७९ असोज ७ गते सो सहकारीलाई दोस्रोपटक समस्याग्रस्त घोषणा गरेको थियो । त्यसलगत्तै समिति बचतकर्ताहरूलाई आफ्नो निक्षेपको मागदाबी गर्न ४५ दिनको म्याद राखेर आह्वान गरेको थियो । त्यस बेला चार हजार २५९ जनाले तीन अर्ब १९ करोड ५० लाख २२ हजार ८६२ रुपैयाँ बचत फिर्ता पाउनुपर्ने दाबी प्रस्तुत गरेका थिए ।
२०६९ सालदेखि बन्द ओरेन्टल सहकारीलाई पहिलोपटक २०७४ कात्तिकमा समस्याग्रस्त घोषणा गरिएको थियो ।
