काठमाडौँ । काठमाडौँमा सुनको सिक्री लुटपाट गर्ने कार्यमा संलग्न चार जना पक्राउ परेका छन् ।
काठमाडौँ उपत्यका अपराध अनुसन्धान कार्यालयले २०८० असार २४ गते आइतबार काठमाडौँमा पत्रकार सम्मेलन गरी सो कार्यमा संलग्न रामेछापका रविन दमाई, सुनसरीका रवि विश्वकर्मा, काभ्रेका उमेश क्षेत्री र धनकुटाका राहुल माझीलाई पक्राउ गरिएको जानकारी गराएको हो ।
पछिल्लो एक महिनायता विशेष गरी मर्निङ वाकमा निस्किने महिलाहरूको घाटीमा लगाइएको सुनको सिक्री लुटिने क्रम बढेको उजुरी आएपछि अनुसन्धानको क्रममा त्यसमा संलग्न उनीहरूलाई पक्राउ गरी सार्वजनिक गरिएको कार्यालयका प्रमुख प्रहरी वरिष्ठ उपरीक्षक डा. मनोजकुमार केसीले बताउनुभयो ।
उहाँले भन्नुभयो– ‘बिहानीपख विशेषत: मर्निङ वाकमा निक्लिने महिलाका सुनको सिक्री लुटिएको भन्ने आधारमा अनुसन्धान सुरु गर्यौं र यो अनुसन्धानलाई अगाडि बढायौँ । यसमा गु्रपनै संलग्न रहेको पाइयो । यसमा ४ जनालाई पक्राउ गरियो ।
बाइकको प्रयोग गरेर उनीहरूले लुटेका हुन् ।’
लुटपाट कार्यमा मोटरसाइकलको प्रयोग गरेको पनि प्रहरीको अनुसन्धानमा खुल्न आएको छ । उनीहरूको साथबाट ११ दशमलव दुई ग्राम तौलको सुनको ढिक्का, सिक्री लुटने क्रममा प्रयोग गरिएका दुईओटा मोटरसाइकल, ४७ ग्रामको सुनको नेक्लेस र छ थान मोबाइल सेट बरामद गरिएको छ ।
लुटिएका सो सुनको कारोबार गर्ने कार्यमा संलग्नको पनि खोजी भइरहेको प्रहरी वरिष्ठ उपरीक्षक केसीले बताउनुभयो ।
