विष्णु शर्मा ##

प्रवासका गल्ली बस्ती
सबै जना उठ्दै
सामाजिक दायित्व पूरा गरौँ
सङ्गठनमा जुटदै

आफ्नो काम त आफै गर्छन्
चराचुरुङ्गीले पनि
मानवीय अभिभारा पूरा गरौँ
सबै सचेत बनी

रहरले प्रदेश ला’को
होइन कोही पनि
स्वदेशमा विकल्प नभए’सि
आयौ बाध्य बनी

नारकीय जीवन छ
परदेशमा हाम्रो
आफ्नै देशमा नभएको
कहाँ हुन्छ र राम्रो ?

सब कुरामा अन्जान बनी
बस्ने होइन परदेशमा
बुझ्नुपर्छ सबै कुरा
के के भा’छ देशमा

देशभित्र भ्रष्टाचारको
बिगबिगी चलिरा’छ
यदाकदा विरुद्धमा
मसाल बलिरा’छ

लाहुरे मात्र बनी हामी
फर्कने होइन देश
यस्तै गरे देश चलाउनेले
पार्छन् देश शेष

देश अनि जनता बेचे
ठाउँमै बसेकाले
खबरदारी गर्न सकौँ
परदेश पसेकाले

देशको छवि उधो पारे
अन्तर्राष्ट्रिय जगत्मा
पापीहरूले दाग लगाए
बहादुरको रगतमा

यिनले गर्दा शिर झुक्यो
नेपाल र नेपालीको
अन्त गर्न मुठी उठाऊ
यिनको हालिमुहालीको

देश फर्केर भ्रष्टाचारीको
कठालो समाउनुपर्छ
जसका लागि पूर्पाधार
आजैदेखि बनाउनुपर्छ