काठमाडौँ । नेपाललाई अतिकम विकसित मुलुकबाट विकासशील देशमा स्तरोन्नति गर्ने रणनीति (एलडिसी स्ट्राटेजी) तर्जुमाको मस्यौदामाथि छलफल भएको छ ।
२०८० असार १७ गते आइतबार राष्ट्रिय योजना आयोगका उपाध्यक्ष डा मीनबहादुर श्रेष्ठको अध्यक्षतामा बसेको निर्देशक समितिको बैठकमा सो मस्यौदामाथि छलफल भएको हो ।
संयुक्त राष्ट्र सङ्घको विकास नीति समितिले सन् २०२१ मा अतिकम विकसित मुलुक (एलडिसी) बाट विकासशील मुलुकमा स्तरोन्नतिका लागि नेपाललाई पाँच वर्षको तयारीको समय दिई स्तरोन्नतिको सिफारिस गरेको थियो अर्थात आगामी २०२६ बाट नेपाल विकाससिल मुलुकमा स्तरोन्नति हुँदै छ ।
उपाध्यक्ष संयोजक रहेको निर्देशक समितिमा अर्थसचिव, परराष्ट्रसचिव, शिक्षा मन्त्रालयका सचिव, उद्योग वाणिज्य मन्त्रालयका सचिवका साथै निजी क्षेत्रबाट प्रतिनिधित्व रहेको छ ।
आइतबारको छलफलमा उपाध्यक्ष डा श्रेष्ठ, आयोगका सदस्य डा रामकुमार फुँयाल, आयोगका सचिव डा तोयनारायण ज्ञवाली, परराष्ट्रसचिव भरतराज पौड्याल, उद्योग, वाणिज्य तथा आपूर्ति मन्त्रालयका सचिव मधुकुमार मरासिनी, अर्थमन्त्रालयका सहसचिव ईश्वरीप्रसाद अर्याललगायत सहभागी हुनुहुन्थ्यो ।
त्यस्तै, निजी क्षेत्रबाट नेपाल उद्योग वाणिज्य महासङ्घका अध्यक्ष चन्द्रप्रसाद ढकाल, नेपाल चेम्बर अफ कमर्सका वरिष्ठ उपाध्यक्ष कमलेश अग्रवाल र नेपाल उद्योग परिसङ्घका उपाध्यक्ष वीरेन्द्रराज पाण्डे उपस्थित हुनुहुन्थ्यो ।
