काठमाडौँ । श्रम रोजगार तथा सामाजिक सुरक्षामन्त्री शरत्सिंह भण्डारीले नेपालसँग दौत्य सम्बन्ध भएका मुलुकहरूसँग श्रमसम्झौता गर्ने दाबी गर्नुभएको छ ।
२०८० असार १७ गते आइतबार काठमाडौँमा नेपाल बैदेसिक रोजगार व्यवसायी सङ्घको एकतिसौँ स्थापना दिवस कार्यक्रममा बोल्दै श्रममन्त्री भण्डारीले यस्तो बताउनुभएको हो ।
उहाँले पछिल्लो समय धेरै देशमा नेपाली कामदार जान नपाउने व्यवस्था रहेको भन्दै अब सरकारले दौत्यसम्बन्ध भएका देशहरूमा श्रम सम्झौता गरी श्रमिक जान पाउनुपर्ने मान्यताअनुसार काम गर्न लागेको बताउनुभयो ।
मन्त्री भण्डारीले सरकारले त्यहीअनुसार विभिन्न देशसँग प्रक्रिया अगाडि बढाएकोसमेत बताउनुभयो ।
उहाँले घरेलु कामदारका विषयमा धेरै कुरा उठेको भन्दै बैदेसिक रोजगारीमा जाने घरेलु कामदारलाई कसरी सुरक्षित बनाउने विषयमा सरकार गम्भीर रहेको बताउनुभयो ।
मन्त्री भण्डारीले दक्ष र सिप भएका नेपाली श्रमिक बैदेसिक रोजगारीमा पठाउने विषयमा सरकार निजी क्षेत्रसँग मिलेर काम गर्ने बताउनुभयो ।
उहाँले विभिन्न देशको प्रणालीअनुसार नेपाल महिलापुरुष दुवै श्रमिक विदेशमा सुरक्षित नभएको स्वीकार गर्नुभयो ।
