काठमाडौँ । राष्ट्रिय जनमोर्चा र नेकपा (एकीकृत समाजवादी) का शीर्षस्थ नेताहरूमाझ समसामयिक राजनीतिक विषयमा छलफल भएको छ ।
नेकपा (मसाल) का महामन्त्री मोहनविक्रम सिंह, राष्ट्रिय जनमोर्चाका अध्यक्ष तथा सांसद चित्रबहादुर केसी, वामपन्थी नेता आनन्द शर्मा र नेकपा (एकीकृत समाजवादी) का सम्मानित नेता तथा पूर्व प्रधानमन्त्री झलनाथ खनालको माझमा छलफल भएको हो ।
२०८० असार १५ गते शुक्रबार दिउसो राजमो केन्द्रीय कार्यालय कपनमा भएको उक्त छलफलमा नेकपा (एकीकृत समाजवादी) का सचिवालय सदस्यहरूसमेतको सहभागिता रहेको थियो ।
वामपन्थी नेता आनन्द शर्माका अनुसार भेटघाटमा गणतन्त्र, राष्ट्रियता, धर्मनिरपेक्षता र नेपालमा बढ्दै गइरहेको अमेरिकी साम्राज्यवादको खतराको बारेमा छलफल भएको थियो ।
‘गणतन्त्र, राष्ट्रियता र धर्मनिरपेक्षताको रक्षाका लागि दुवै दल एकताबद्ध भएर काम गर्नुपर्दछ भन्ने विषयमा व्यापक छलफल भयो’ शर्माले भन्नुभयो– ‘साथै पछिल्लो समयमा अमेरिकी साम्राज्यवादको खतरा बढ्दै गइरहेको बारेमा पनि गहिरो गरी छलफल भएको थियो ।’
छलफलमा प्रतिगामी खतराका विरुद्ध अहिलेको गठबन्धनलाई टिकाउनुपर्ने आवश्यकताको बारेमा पनि छलफल भएको उहाँले जानकारी दिनुभयो ।
छलफलको क्रममा कतिपय विषयमा समान धारणा देखा परेको पनि उहाँले जानकारी दिनुभयो ।
‘तीनै जना उच्चस्तरीय नेताहरूको माझमा अत्यन्तै सौहार्दपूर्ण वातावरणमा छलफल भयो । त्यस क्रममा कतिपय विषयमा समान समझदारी कायम भएको छ’ नेता शर्माले युगदर्शनलाई जानकारी गराउनुभयो ।
