भीमदत्तनगर । भीमदत्त नगरपालिकाका तत्कालीन नगरप्रमुख (मेयर) सुरेन्द्रबहादुर विष्टसहित १२ जना विरुद्ध भ्रष्टाचार मुद्दा दर्ता भएको छ ।
अख्तियार दुरुपयोग अनुसन्धान आयोगले राजस्व चुहावट गरेर भ्रष्टाचार भएको भन्दै तत्कालीन नगर प्रमुख विष्ट, प्रमुख प्रशासकीय अधिकृत पुष्करप्रसाद भट्ट, निमित्त प्रमुख प्रशासकीय अधिकृत हरिदत्त जोशीसहित १२ जना विरुद्ध भ्रष्टाचार मुद्दा दायर गरेको हो ।
भीमदत्त नगरपालिकाले आर्थिक वर्ष २०७७/७८ मा प्राकृतिक स्रोतबाट (नदीजन्य) प्राप्त हुने आयको ठेक्कामा बोलपत्रको सम्झौताअनुसार प्राप्त गर्नु पर्ने आयमा नियम विपरीत छुट दिएको भन्दै २०८० असार १० गते आइतबार विशेष अदालतमा भ्रष्टाचार मुद्दा दर्ता भएको आयोगका प्रवक्ता भोला दाहालले जारी गरेको विज्ञप्तिमा उल्लेख छ ।
कोरोना कहरका बेला महाकालीको नदीजन्य पदार्थ उत्खनन्बापत उठाउनुपर्ने नियमअनुसारको राजस्व नउठाएर सङ्घ सरकार र प्रदेश सरकारको स्वीकृतबिना कार्यदलको सिफारिसमा भवानी कन्स्ट्रक्सनलाई राजस्व छुट दिइएको आरोप छ ।
राजस्व रकम घटाएर कम अङ्कमा सम्झौता र नियम विपरीत राजस्व रकममा छुट दिँदा मूल्य अभिवृद्धि करसहित ३ करोड ३३ लाख २२ हजार ५८३ रुपैयाँ चुहावट भएको उल्लेख छ ।
भ्रष्टाचार निवारण ऐन–२०५९ को दफा ३ को उपदफा १ र त्यसकै (झ) का अनुसार कारबाही र दफा ७ बमोजिम चुहावट रकम राजस्वको दोब्बर जरिवाना माग गरिएको छ ।
अन्य जनप्रतिनिधि र कर्मचारी पनि भ्रष्टाचार मुद्दामा मुछिएका छन् । भीमदत्त नगरपालिकाका तत्कालीन राजस्व छुटका लागि गठित कार्यदलका संयोजक तथा सदस्यहरू, तत्कालीन वडा नं. १७ को अध्यक्ष हिमालबहादुर चन्द, प्रशासकीय अधिकृत हरिसिंह धामी र शाखा अधिकृत नरबहादुर शाह, इन्जिनियर हिमालय सिंह ऐर र गोविन्दराज उपाध्याय विरुद्ध मुद्दा दायर भएको हो ।
भवानी कन्स्ट्रक्सनका सञ्चालकहरू केशवराज भट्ट, पुष्पराज भट्ट, प्रतिनिधि दिवाकर भट्ट, स्मृतिशेष ईश्वरिप्रसाद भट्टकी पत्नी खगेश्वरी भट्टलाई तीन करोड ३३ लाख २२ हजार ५८३ बिगो असुलउपर तथा कारबाहीको मागसहित अख्तियारले आरोप पत्र दायर गरेको छ ।
