काठमाडौँ । नेपाल राष्ट्र बैङ्कले बिद्युतीय मुद्रा (डिजिटल करेन्सी) जारी गर्ने तयारी गरेको छ ।
केन्द्रीय बैङ्कका कार्यकारी निर्देशक गुरुप्रसाद पौडेलले हालसम्म विश्वका ११ मुलुकले बिद्युतीय मुद्रा जारी गरिसकेकाले नेपालले पनि त्यसबारे अध्ययन र तयारी गरेको बताउनुभएको हो ।
वित्तीय तथा बिद्युतीय साक्षरताबारे माछापुच्छ्रे बैङ्क र निजी तथा आवासीय विद्यालय अर्गनाइजेसन (प्याब्सन), नेपालबिचको सहमतिपत्रमा हस्ताक्षर कार्यक्रममा कार्यकारी निर्देशक पौडेलले बिद्युतीय साक्षरताबारे पुराना पाठ्यक्रम पढाएरभन्दा पनि आधुनिकताको विकाससँगै हरेक दिनका नवीन आयामलाई शिक्षक र विद्यार्थीले आत्मसात् गर्न पाउनुपर्नेमा जोड दिनुभयो ।
उहाँका अनुसार हाल प्रतिमहिना औसतमा रु ४० अर्बको बिद्युतीय कारोबार हुने गरेको छ । गत वैशाखमा क्युआर कोडमार्फत ८६ लाख व्यक्तिले रु २६ अर्बभन्दा बढीको कारोबार गरेको भन्दै नेपालमा बिद्युतीय कारोबारको प्रयोग बढ्दो रहेको बताउनुभयो ।
राष्ट्र बैङ्कले चालु आर्थिक वर्षलाई बिद्युतीय भुक्तानी प्रवद्र्धन वर्षका रूपमा सञ्चालन गरिरहेको छ ।
माछापुच्छ्रे बैङ्कका अध्यक्ष डा उपेन्द्र महतोले वित्तीय र बिद्युतीय कारोबारलाई बढाएर समृद्ध मुलुक निर्माणमा योगदान दिन सकिने बताउनुभयो ।
प्याब्सनका अध्यक्ष डिके ढुङ्गानाले आर्थिक कारोबार र बिद्युतीय मुद्दामा तल्लो तहसम्म सचेतना प्रवाह नभएसम्म मुलुक समृद्ध हुन नसक्ने बताउनुभयो ।
सो अवसरमा प्याब्सन अध्यक्ष ढुङ्गाना र बैङ्कका प्रमुख कार्यकारी निर्देशक सन्तोष कोइरालाबिच वित्तीय तथा बिद्युतीय साक्षरता अभियानसम्बन्धी सहमतिपत्रमा हस्ताक्षर भएको थियो ।
