ध्रुव गिरी ##

पन्ध्र वर्षे यौवनको प्रवेशसँगै
भ्रष्टाचार गर्ने हिम्मत र आँट गर्दै
हत्या, हिंसाका अपराधीलाई आम माफी दिँदै
बडो उत्साह, उमङ्ग बोकी आएको छ त गणतन्त्र

कानुन, अदालतको कुरै नगर
दुई वर्षे दुधे बालक अनि
राष्ट्रसेवक प्रहरीमाथिको क्रुरता
असहाय बनाइएका टुहुरा सन्तान अनि विधुवा
यी सबैका पीडा र वेदना सुन्दै नसुन
बरु सुनलाई पितल भन
दोषीलाई निर्दोष भन
किनभने यहाँ आएको छ त गणतन्त्र

धन भए पढ्न पाउछौँ भएन, निरक्षर नै बस
पैसा भए औषधोपचार पाउछौँ, नभए अकालमै मर
ढाँटछल, लुट, डकैतीका नाइकेलाई मतदान गर
तिमीले गरे यस्तै संरक्षण पाउँछौ खबर मात्रै गर
भ्रष्टाचार गरुन् देश बेचुन चिम्म गरेर ताली पिट्ने गर
किनभने यहाँ तिमीलाई त आएको छ गणतन्त्र

रक्सीमासुसँग मत साटेर
भ्रष्टलाई राज्यको मालिक बनाउन ताली पिटेर
राज्यको ढुकुटी विदेश राख्न लगाऊ
तिमी पनि काम र माम खोज्दै पासपोर्ट बोकेर जाऊ
जननीको मासु लुछेर खाने भ्रष्टलाई मालिक बनाऊ
तस्कर घुसखोरी हत्याराहरूलाई नेता बनाऊ
किनभने तिमीले खोजे जस्तै आएको छ त गणतन्त्र

किन चाहियो कालापानी लिम्पियाधुरा
छ त हेरेर चित्त बुझाउ चुच्चे नक्सा
लाखाँै धन जुटाऊ शरणार्थी बन्छौँ अमेरिका पक्का
मानव हत्या गर, भ्रष्टाचार गर
कमिसन खाऊ, कमिसन देऊ
राज्य नै हो नि तिम्रै बिर्ता
किनभने यस्तै यस्तैलाई त आएको छ गणतन्त्र

कानुन र अदालतको के मान्यता ?
भनिदेऊ कानुनी राज्य हो पत्याइहाल्छौँ
सर्वोच्च अदालत त नाममा राख्ने हो
सर्वोच्चको काम त हामी मन्त्रिपरिषद्को पो
हत्या, हिंसा, भ्रष्टाचार, बलात्कार गर
तिमी हाम्रा अन्धभक्त कार्यकर्ता हौ नि
गणतन्त्रको अवसरमा आममाफी दिन्छौ नि
किनभने हाम्रै लागि त आएको छ गणतन्त्र

(लेखक साहित्य परिषद् प्युठानको सचिव हुनुहुन्छ)