काठमाडौँ । अर्थमन्त्री डा. प्रकाशशरण महतले आगामी आर्थिक वर्ष २०८०/८१ को बजेट निर्माणमा बजेट तर्जुमा दिग्दर्शनमा उल्लेखित पदाधिकारी मात्रै बसेर करका दर निर्धारण गरिएको दाबी गर्नुभएको छ ।
प्रतिनिधिसभाको २०८० जेठ २३ गते मङ्गलबारको बैठकमा सदस्यहरूले बजेट निर्माणका क्रममा अनधिकृत व्यक्तिको संलग्नताबारे उठाएको जिज्ञासामा उहाँले आधिकारिक व्यक्ति मात्रै बसेर करका दरलाई वैज्ञानिक बनाइएको बताउनुभयो ।
उहाँले गोप्य कोठामा आधिकारिक व्यक्ति मात्र बसेर करका दर बढाउने, घटाउने र हेरफेर गर्ने निर्णय गरिएको बताउनुभयो ।
‘करका दरसम्बन्धी निर्णय हामीले स्वतन्त्रपूर्वक गरेका छौँ । आन्तरिक अध्ययन, सरोकारवालाका सुझाव तथा राजस्व परामर्श समितिको सिफारिसका आधारमा हामीले निर्णय गरेका हाँै’ उहाँले भन्नुभयो ।
आफूले कुनै पनि प्रभावबाट मुक्त भएर पारदर्शी ढङ्गबाट काम गरेको उल्लेख गर्दै उहाँले प्रभावबाट मुक्त भएर काम गर्छु भनेर मन्त्रालय छिरेको बताउनुभयो ।
‘त्यही प्रतिबद्धता पालना गरेको छु । जिम्मेवारीमा रहेसम्म कर्तव्य निष्ठताका साथ काम गर्छु । यो विश्वास दिलाउन चाहन्छु’ अर्थमन्त्री डा. महतले भन्नुभयो ।
बजेट निर्माणमा आवश्यक सहयोगीका सम्बन्धमा आफू मन्त्रालयमा आउनुभन्दा नै अगाडि निर्णय भइसकेको उहाँले प्रस्ट्याउनुभयो ।
‘म आउनुअगाडि नै रामकृष्ण श्रेष्ठले नियुक्त पाइसकेको रहेछ । तिसौँ वर्षदेखि यही काम गर्दै आएको अनुभवी, दक्ष र इमान्दार भएर उहाँलाई ल्याइएको रहेछ’ उहाँले भन्नुभयो– ‘निर्णय प्रक्रियामा उहाँको संलग्नता छैन । निर्णय भइसकेको कुरा इन्ट्री गर्ने उहाँको जिम्मेवारी हो । बजेटमा जे आएको छ, त्यसको स्वामित्व हामीले लिएका छौँ, कुनै बाह्य व्यक्तिको संलग्नता नभएको विश्वास दिलाउँछु ।’
गोप्य रूपमा, छोटो समयमा काम गर्नुपर्ने र टाइप गर्नका लागि आवश्यक सहयोगी चाहिने उहाँको भनाइ छ ।
‘निर्णय गर्ने ठाउँमा उहाँ हुनुहुन्न । निर्णय प्रक्रियामा बसेको पदाधिकारीको उपस्थितिमा ‘यो यो इन्ट्री गर’ भन्ने निर्देशनमा श्रेष्ठले लेख्नुभएको हो’ अर्थमन्त्रीले भन्नुभयो । उहाँले नियोजित रूपमा लगाइएको आरोपका आधारमा अविश्वास गर्न नहुने बताउनुभयो ।
सहयोगीको आफूसँग कुनै कुनै चिनजान नरहेको पनि उहाँले जानकारी गराउनुभयो ।
‘आधिकारिक व्यक्तिले आधिकारिक निर्णय भएको करको दर, संशोधनलगायतलाई इन्ट्री गर्नका लागि उहाँले वर्षौंदेखि लगातार काम गर्दै आउनुभएको छ । सोही प्रयोजनका लागि मअघिको मन्त्रीले श्रेष्ठलाई नियुक्त गर्नुभएको होला’ अर्थमन्त्री डा. महतले भन्नुभयो– ‘उहाँले आधिकारिक रूपमा सहयोगीको भूमिका निर्वाह गर्नुभयो । गोप्य निर्णय गर्ने ठाउँमा उहाँ कहिँ कतै संलग्न हुनुहन्न ।’ उहाँले बिचौलियालाई त आफूले छेउछाउमा आउन पनि नदिएको बताउनुभयो ।
बिद्युतीय सवारीलाई प्रोत्साहन गर्न यसअघि कम भन्सार दर राखिएको उल्लेख गर्दै उहाँले विद्युतीय सवारीमा लाग्ने करलाई समयानुकूल बनाउनुपर्ने भएकाले करका दर पुनरावलोकन गरिएको बताउनुभयो ।
‘विद्युतीय सवारीको बिक्रीमा ठुलो मार्जिन छ, जुन उपभोक्तामा सरिरहेको छ । हामीले छुट दिए पनि ग्राहकले नपाउने अवस्था विद्यमान छ । त्यसलाई हेर्नुपर्ने अवस्था छ । यसमा इफ र बट छैन’ अर्थमन्त्रीले भन्नुभयो– ‘पुन: समायोजन गरिएको हो, पेट्रोलियम सवारीमा लगाइएको करभन्दा धेरै गुणा कम छ ।’
