सन्तोष सुनार, अर्घाखाँची ।
राष्ट्रिय जनमोर्चाकी उपाध्यक्ष तथा प्रवक्ता दुर्गा पौडेलले आफ्नो पार्टी गणतन्त्र, राष्ट्रियता र धर्म निरपेक्षताका लागि निरन्तर सङ्घर्षरत रहेको बताउनुभएको छ ।
उहाँले भन्नुभयो– ‘गणतन्त्र, राष्ट्रियता र धर्म निरपेक्षताको रक्षा तथा सङ्घीयताको खारेजीका लागि हाम्रो पार्टी राष्ट्रिय जनमोर्चा सदनदेखि सडकसम्म सङ्घर्ष गरिरहेको छ ।’
प्रगतिशील पत्रकार सङ्घ अर्घाखाँचीको आयोजनामा राजमोको मेची–महाकाली अभियान टोलीले २०८० जेठ १२ गते शुक्रबार सदरमुकाम सन्धिखर्कस्थित राजमो जिल्ला कार्यालमा आयोजित पत्रकार सम्मेलनमा नेतृ पौडेलले यस्तो अभिव्यक्ति दिनुभएको थियो ।
राजमो नेतृ पौडेलले त्यसका अतिरिक्त पार्टीले जनजीविकाको पक्षमा लगातार आवाज उठाउँदै आएको बताउनुभयो ।
उहाँले भन्नुभयो– ‘जनजीविकाको साथै देशमा हुने सबै प्रकारका शोषण, उत्पीडन, अत्याचार, भ्रष्टाचार, अनियमितता तथा जनविरोधी क्रियाकलापमाथि पनि गम्भीरताका साथ ध्यानाकर्षण गराउँदै आइरहेको छ ।’
कार्यक्रममा पत्रकारहरूले सङ्घीयता, एमसिसी, एसपिपी, नक्कली भुटानी शरणार्थी प्रकरण, विद्यार्थी, किसानलगायत जनवर्गका समस्याका बारेमा प्रश्न सोधेका थिए ।
प्रश्नको जवाफ रूपमा दिँदै नेतृ उहाँले विद्यार्थीहरू जागिर, व्यापार गर्न नसक्ने बेलासम्म नेपालमा नै शिक्षा लिने, त्यसपछि सरकारले काम गर्ने वातावरण बनाउन नसकेका कारण धेरै युवायुवतीलाई बिदेसशन बाध्य भएको बताउनुभयो ।
पत्रकार सम्मेलनमा प्रगतिशील पत्रकारका केन्द्रीय सचिव गोपाल प्रसाद भट्टराई, नेपाल पत्रकार महासङ्घ अर्घाखाँची जिल्ला अध्यक्ष अशोक खनाल, सचिव रुद्रमणि भुसाल, सचिव अनिल नेपाली, नेपाल पत्रकार माहासङ्घमा केन्द्र, प्रदेश, जिल्लामा आबद्ध पत्रकार र विभिन्न मिडियाका पत्रकारको उपस्थिति थियो ।
प.प.स. अर्घाखाँचीका अध्यक्ष जितेन्द्र खत्रीको अध्यक्षतामा अघि बढेको कार्यक्रमको सञ्चालन सचिव भगवता पाण्डेले गर्नुभएको थियो ।
सो अवसरमा टोलीलाई प्रगतिशील पत्रकार सङ्घले स्वागत तथा सम्मान गरेको थियो ।
