काठमाडौं । रवि लामिछाने नेतृत्वको राष्ट्रिय स्वतन्त्र पार्टीमा रकम लेनदेनको विषयले बबाल भएको छ । निलम्बित सांसद ढाकाकुमार श्रेष्ठले आफूलाई सांसद बनाउन पार्टीका उपसभापति डिपी अर्याल र महामन्त्री मुकुल ढकालले दुई करोड ८४ लाख रुपैयाँ मागेको आरोप लगाएका थिए । ढाकाकुमारको सो भनाईपछि रास्वपामा खैलाबैला मच्चिएको छ ।
रास्वपाका महामन्त्री तथा प्रवक्ता डा. मुकुल ढकालले श्रेष्ठविरुद्ध मानहानीको मुद्दा हाल्ने बताएका छन्। सामाजिक सञ्जाल फेसबुकमा लेख्दै प्रवत्ता ढकालले आफुहरुको मान, प्रतिष्ठा र इज्जतलाई धुमिल्याएको भन्दै २ करोड ८४ लाख बराबर नै क्षतिपूर्तिको माग दाबीसहित अदालतमा मानहानीको मुद्दा हाल्ने तयारीमा रहेको जनाएका छन् ।
‘केही सञ्चारमाध्यममा मैले र पार्टी उपसभापति डीपी अर्यालले ढाकाकुमार श्रेष्ठसँग २ करोड ८४ लाख मागेको भनेर समाचार आएकोमा गम्भीर ध्यानाकर्षण भएको छ ’ उनले लेखेका छन्, ‘यो हाम्रो मान, प्रतिष्ठा र इज्जतलाई धुमिल्याउन सकिन्छ कि भनेर सार्वजनिक गरिएको देखिन्छ। यसलाई कसैले पुष्टि गर्छ भने हामी जस्तोसुकै सजाय भोग्न तयार छौँ। यसबाट हामीले हाम्रो मानहानि भएको महसुस गरेको हुँदा अदालतमा मानहानिको मुद्दा दर्ता गर्दै छौँ।’
आरोप लगाइएको २ करोड ८४ लाख बराबर नै क्षतिपूर्तिको माग दावि गरि मुद्दा दर्ता गर्ने र अदालतले दिने क्षतिपूर्ति रास्कोट अस्पताललाई सहयोगार्थ दिने उनले लेखेका छन् ।
मन्त्री बन्न पार्टीलाई दुई करोड रुपैयाँ बुझाउनुपर्ने भन्दै व्यवसायी दुर्गा प्रसाईंसँग रकम माग गरेको अडियो बाहिरिएपछि ढाकाकुमारलाई रास्वपाले निलम्बन गरेको थियो ।
निलम्बित सांसद ढाकाकुमारले पार्टी नेताहरुले समानुपातिक सांसद बनाउँदा आफूसँग दुई करोड ८४ लाख रुपैयाँ मागेको सार्वजनिक रुपमै बताउँदै आएका छन् ।
रास्वपाले उनलाई सांसदबाट हटाएर विन्दबासिनी कंशाकारलाई सांसद बनाउने निर्णय गरेको छ । त्यसविरुद्ध सर्वोच्च अदालत गएका ढाकाको पक्षमा अदालतले आदेश नदिएपछि बिन्दबासिनी सांसद बन्ने पक्का भएको छ ।
