चितवन । राष्ट्रिय जनमोर्चाले निर्वाचन प्रचार प्रसारको शिलशिलामा चितवनमा एक लाख पर्चा वितरण गरेको छ ।
यही वैशाख १० गते हुने उपनिर्वाचनको प्रचारका क्रममा करिब एक लाख पर्चा वितरण गरिएको, सबै टोल र वस्तिमा पुगेर जनभेटघाट भएको तथा कैयौं स्थानमा कोणसभा गरिएको महासचिव मनोज भट्टले जानकारी दिनुभयो ।
राजमो ‘अमेरिकी साम्राज्यवादको भण्डाफोर गरौँ’ भन्ने नारासहित निर्वाचनमा होमिएको छ । चितवन –२ को उपनिर्वाचनमा राजमोले पार्टीका उपाध्यक्ष जनकराज शर्मालाई उम्मेदवार बनाएको छ ।
निर्वाचन प्रचार प्रसारका क्रममा राजमोले नेपालमाथि अमेरिकाले गरिरहेको हस्तक्षेप र नयाँ गठन भएको रास्वपाको अमेरिकासँगको साँठगाँठबारे जनतामाझ स्पष्ट पारेको छ ।
दोहोरो नागरिकता मुद्दामा सर्वोच्च अदालतबाट रवि लामिछानेले सांसद पद गुमाएपछि चितवनमा उपचुनाव हुन लागेको हो ।
गएको आम निर्वाचनमा अत्यधिक मत ल्याएका लामिछाने एक पछि अर्को विवादमा मुछिँदै जाँदा र गृहमन्त्री हुँदा राष्ट्रिय परिचयपत्रको विवरण रुजु गर्ने जिम्मा नियम मिचेरै विदेशी कम्पनीलाई दिएपछि उनको ‘क्रेज’ ह्वात्तै घटेको आम बुझाई छ ।
