काठमाडौं । अन्तर्राष्ट्रिय नेपाली एकता समाजले विदेशमा रहेका नेपालीहरुलाई आफू कार्यरत स्थानबाट मतदानको व्यवस्था गर्न माग गरेको छ ।
बुधबार प्रधानमन्त्री पुष्पकमल दाहाल प्रचण्डलाई ज्ञापन पत्र बुझाउँदै अन्तर्राष्ट्रिय नेपाली एकता समाजले सर्वोच्च अदालतले २०७५ सालमा विदेशस्थित नेपालीलाई सबै स्तरको चुनावमा मताधिकारको व्यवस्था गर्न आदेश दिइसकेको स्मरण पनि गराएको छ ।
ज्ञापन पत्रमा भनिएको छ, ‘हाम्रो सङ्गठन आगामी चुनावमा भारत, सार्क मुलुक र अन्य देशमा रहेका नेपाली नागरिकलाई सम्बन्धित देशबाटै मताधिकारका साथै सम्बन्धित देशमा रहेका नेपाली मतदाताको अनुपातमा नेपालको व्यवस्थापिकामा समानुपातिक प्रतिनिधित्वको व्यवस्था गर्न माग गर्दछ ।’
एकता समाजले पहिलो संविधान सभा निर्वाचनको सन्दर्भमा मतदाता नामावली संकलन गर्ने समयदेखि नै भारतसहित विदेशस्थित नेपाली नागरिकका लागि मताधिकार र समानुपातिक प्रतिनिधित्वको माग गर्दै आएको थियो । त्यसयता विश्वभरबाट नेपाली एकता समाजले आवाज उठाइरहेको छ भने राष्ट्रिय जनमोर्चाले सडक र संसदमा आवाज उठाइरहेको छ ।
निर्वाचन आयोगले पछिल्लो चुनावको सन्दर्भमा विदेशस्थित नेपालीको मतदाता नामावली सङ्कलन गर्न बजेट छुट्याउन माग गरेको थियो तर सरकारले बजेट विनियोजन गरेन ।
सो ज्ञापन पत्र बुझाउन अन्तर्राष्ट्रिय नेपाली एकता समाजका अध्यक्ष शक्तमान बुढाथोकी, राष्ट्रिय जनमोर्चाका अध्यक्ष चित्रबहादुर केसी, उपाध्यक्ष दुर्गा पौडेलसहितको टिम प्रधानमन्त्री कार्यालय पुगेको थियो ।
समाजले वैदेशिक रोजगारीमा जाने नेपालीहरुका समस्या समेटेर प्रधानमन्त्रीलाई ११ बुँदे ज्ञापन पत्र बुझाएको हो ।
अन्तर्राष्ट्रिय नेपाली एकता समाजले बुझायो प्रधानमन्त्रीलाई ज्ञापनपत्र
